EPFOએ શરુ કરી વ્હોટ્સએપ સેવા, 22 જુદી-જુદી સુવિધા મળશે

નવી દિલ્હી: EPFO દ્વારા હવે Whatsapp હેલ્પલાઈન સર્વિસ શરુ કરવામાં આવી છે. શ્રમ મંત્રાલયના જણાવ્યા અનુસાર, ખાતાધારકોને થતી કોઈપણ સમસ્યાનું જલ્દીથી નિરાકરણ લાવી શકાય તે હેતુથી આ સર્વિસ શરુ કરવામાં આવી છે. હાલ સોશિયલ મીડિયા, વેબસાઈટ, ચોવીસે કલાક ચાલતી હેલ્પલાઈન ઉપરાંત હવે પીએફ ખાતાધારકો વ્હોટ્સએપના માધ્યમથી પણ પીએફ ઓફિસનો સંપર્ક કરી શકશે.

હાલ EPFOની 138 સ્થાનિક ઓફિસોમાં વ્હોટ્સએપ હેલ્પલાઈન નંબર કાર્યરત થઈ ગયા છે. કોઈપણ ખાતાધારક ગમે તે સવાલનો જવાબ આ માધ્યમથી મેળવી શકે છે. તેનું પીએફ અકાઉન્ટ જે ઓફિસમાં આવેલું હોય, તેનો તે વ્હોટ્સએપ પર સીધો સંપર્ક કરી શકશે. EPFOની સત્તાવાર વેબસાઈટના હોમ પજ પર તમામ ઓફિસોના વ્હોટ્સએપ નંબર આપવામાં આવ્યા છે.


આ વ્હોટ્સએપ સર્વિસમાં જુદી-જુદી 22 પ્રકારની સર્વિસ ઓફર કરવામાં આવે છે. જેમાં કોવિડ એડવાન્સથી લઈને ઈપીએફ ટ્રાન્સફર, યુએએન એક્ટિવેશન, કેવાયસી અપડેશન સહિતની સુવિધાઓનો સમાવેશ થાય છે. શ્રમ મંત્રાલયના જણાવ્યા અનુસાર, ખાતેદારને કોઈ તકલીફ ના પડે તે માટે એક્સપર્ટની ટીમ પણ રોકવામાં આવી છે.

EPFOનો દાવો છે કે, તેણે અત્યારસુધી 1,64,040 જેટલી ક્વેરી વ્હોટ્સએપ દ્વારા સોલ્વ કરી છે. આ સર્વિસ શરુ થવાથી ટ્વીટર અને ફેસબુક પરનો ધસારો પણ ઘટી ગયો છે. કોરોનાને કારણે પીએફ વીડ્રો કરનારા લોકોની સંખ્યામાં મોટો વધારો થયો છે, ત્યારે આ સુવિધાથી પીએફ ઓફિસે ધક્કા ખાવાની જરુર નહીં પડે તેવું પણ EPFOનું માનવું છે.