નોકરિયાત પત્નીની પતિ કરતા વધારે આવક હોય તો ખાધાખોરાકી માંગી શકે? કોર્ટે સંભળાવ્યો મહત્વનો ચુકાદો

મુંબઈ- સેશન કોર્ટ દ્વારા મુંબઈ શહેરના ઘાટકોપર વિસ્તારમાં રહેતા એક 52 વર્ષીય વેપારીને આદેશ આપવામાં આવ્યો છે કે તેમણે પોતાના 47 વર્ષીય પત્નીને 16000 રુપિયા ખાધાખોરાકી તરીકે દર મહિને આપવાના રહેશે. ઉલ્લેખનીય છે કે વેપારીના પૂર્વ પત્નીની પણ દર મહિને 30,000 રુપિયાની આવક છે. પરંતુ કોર્ટે મહત્વની ટિપ્પણી કરતાં જણાવ્યું કે, મહિલા કામ કરતી હોય અને તેની આવક પતિ કરતા વધારે હોય તો માત્ર એ જ કારણોસર તેના ભરણપોષણ માંગવાના અધિકારને ટાળી ના શકાય.

કોર્ટમાં રજૂ કરવામાં આવેલી માહિતી અનુસાર, આ કેસમાં પતિની વાર્ષિક આવક 2.90 લાખ રુપિયા છે, જ્યારે પત્નીની આવક 3.50 લાખ પ્રતિ વર્ષ છે. જ્યારે મેજીસ્ટ્રેટ કોર્ટે પત્નીની તરફેણમાં ચુકાદો સંભળાવ્યો તો પતિ આ દલીલ સાથે સેશન્સ કોર્ટ પહોંચ્યો હતો. પરંતુ સેશન્સ કોર્ટ દ્વારા પણ કહેવામાં આવ્યું કે, મેજીસ્ટ્રેટ કોર્ટમાં જે અવલોકન કરવામાં આવ્યા અને જે ચુકાદો સંભળાવવામાં આવ્યો તે યોગ્ય તેમજ કાયદાકીય છે. સેશન કોર્ટે જણાવ્યું કે, પ્રાથમિક દ્રષ્ટિએ કહી શકાય કે પતિની આવક પત્ની કરતા ઓછી છે. પરંતુ આખરે પત્નીની જવાબદારી પતિની છે. પત્નીની આવક ગમે તે હોય, તેના ભરણપોષણ માટે પતિ જવાબદાર છે. માટે ચુકાદામાં કોઈ સુધારો-વધારો કરવાની જરૂર નથી.

સુંદર છોકરીનો ફોટો હોય અને મેસેજ આવે કે 'ઓપન થઈને વિડીયો કૉલ કરવો છે?' તો આટલું યાદ રાખજો
આ કેસમાં પતિનો દાવો છે કે તેમના પૂર્વ પત્ની પોતાના દીકરાઓ સાથે શહેરના પોશ વિસ્તારમાં એક અપાર્ટમેન્ટમાં રહે છે, જેના માટે 26,000 રુપિયા પ્રતિ મહિના ભાડુ ચૂકવે છે. જ્યારે તેઓ એક કેમ્પમાં રહે છે, જ્યાં જાહેર શૌચાલયનો ઉપયોગ કરવામાં આવે છે. આ સિવાય પતિએ દાવો કર્યો કે, માત્ર તેમના પૂર્વ પત્ની જ નહીં, બન્ને દીકરાઓ પણ તેમના કરતા વધારે કમાણી કરે છે. પતિના વકીલે કહ્યું કે, પતિની સરખામણીમાં પત્નીની નાણાંકીય સ્થિતિ ઘણી સારી છે. વર્ષ 2015માં કોઈ કારણ વિના જ પત્ની પતિને છોડીને જતી રહી હતી.

પરંતુ મહિલાનો આરોપ છે કે તેમના પતિની આવક માસિક એક લાખ રુપિયા છે. ચુકાદો સંભળાવતી વખતે સેશન્સ કોર્ટ દ્વારા સુપ્રીમ કોર્ટના ચુકાદાને ટાંકવામાં આવ્યો હતો જેમાં કહેવામાં આવ્યુ હતું કે, જો પત્ની નોકરિયાત મહિલા હોય તો પણ તે ભરણપોષણ મેળવાવનો અધિકાર ધરાવે છે. માટે આ કેસમાં પણ પતિ દ્વારા કરવામાં આવેલી દલીલોને ફગાવવામાં આવે છે. આ સિવાય કોર્ટે કહ્યું કે, વર્તમાનમાં પોતાના ખર્ચા સિવાય પતિએ અન્ય કોઈ જવાબદારી ઉપાડવાની નથી. વેપારની સાથે સથે તે અન્ય સંપત્તિનો પણ માલિક છે. જ્યાં સુધી ઘરેલુ હિંસાનો કેસ ચાલે છે ત્યાં સુધી પતિએ માત્ર ખાધાખોરાકી જ નહીં, ભાડું પણ ચૂકવવું પડશે.

પતંજલિની કોરોનિલ કિટ વાપરતાં હોય તો ખાસ વાંચો, 3માંથી એક વસ્તુ સબ સ્ટાન્ડર્ડ મળી આવી
ઉલ્લેખનીય છે કે, આ કેસમાં પત્નીએ પતિ વિરુદ્ધ મેજીસ્ટ્રેટની કોર્ટમાં ઘરેલુ હિંસાની ફરિયાદ દાખલ કરી હતી. 2015માં તેઓ અલગ થઈ ગયા હતા. પતિએ તમામ આરોપોને પાયાવિહોણા જણાવ્યા છે. પતિ જણાવે છે કે, તેમણે પત્નીને બોલાવવા માટે ઘણી વાર આમંત્રણ મોકલ્યુ હતું જેથી તેઓ સાથે રહી શકે પણ તે આવવા તૈયાર નહોતા. પછી પતિએ છૂટાછેડાની અજી દાખલ કરી હતી.