13,000 ફૂટ ઊંચાઈ પર દુનિયાની સૌથી લાંબી સુરંગ, ચીન બોર્ડર સુધી આર્મી મૂવમેન્ટ થશે ફાસ્ટ

નવી દિલ્હીઃ અરુણાચલ પ્રદેશમાં સેલા સુરંગ પ્રોજેક્ટ માટે ખોદકામ પૂર્ણ થઈ ગયું છે. બોર્ડર રોડ્સ ઓર્ગેનાઈઝેશન (BRO)એ શનિવારે સુરંગ માટે અંતિમ ધડાકો કર્યો હતો. સેલા ટનલ 13,000 ફૂટ કરતા વધુ ઊંચાઈ પર બનેલી દુનિયાની સૌથી મોટી ડબલ લેન ટનલ હશે. સંરક્ષણ મંત્રાલય મુજબ, સેલા ટનલ પ્રોજેક્ટ હવે અંતિમ તબક્કામાં પહોંચ્યો છે. ચીન સાથે જોડાયેલા અરુણાચલ પ્રદેશમાં આ ટનલ સૈનિકોને તવાંગ સેક્ટરના ફોરવર્ડ એરિયા સુધી જલદી પહોંચાડવા માટે ગેમચેન્જર સાબિત થશે. એક નિવેદનમાં સંરક્ષણ મંત્રાલયે કહ્યું કે 980 મીટર લાંબી એક ટનલ માટે અંતિમ ધડાકો વર્ચ્યુઅલ સેરેમની દ્વારા કરાયો છે. રિમોટ દ્વારા બટન BROના ડિરેક્ટર લેફ્ટનન્ટ જનરલ રાજીવ ચૌધરીએ દબાવ્યું હતું.

સામાન્ય ઘટાડા સાથે કોરોનાના 3.33 લાખ ડેઈલી કેસ નોંધાયા, રિકવરી રેટ ઘટીને 93.18% થયો
સેલા ટનલ પ્રોજેક્ટમાં શું છે ખાસ?
-પ્રોજેક્ટ હેઠળ તવાંગ અને વેસ્ટ કોમેંગ જિલ્લા વચ્ચે બે સુરંગ બની રહી છે, ટનલ-1 અને ટનલ-2
- 1,555 મીટર ટ્વિન ટ્યુબ ચેનલ તૈયાર કરવામાં આવી રહી છે. બીજી ટનલ 980 મીટર લાંબી છે.
- સેલા ટનલ 13,500 ફૂટ કરતા વધારે ઊંચાઈ પર બે લેનવાળી દુનિયાની સૌથી લાંબી ટનલ છે
- ટનલ-2માં ટ્રાફિક માટે એક બાય-લેન ટ્યુબ હશે અને એક એસ્કેપ ટ્યુબ હશે. એટલે કે મુખ્ય ટનલની બાજુમાં એટલી જ લંબાઈવાળી અન્ય એક સુરંગ બની રહી છે, જે કોઈ ઈમર્જન્સી સમયમાં કામ લાગશે.
- લેટેસ્ટ ટેક્નોલોજીનો ઉપયોગ કરીને બનાવાઈ છે ટનલ, બરફની પણ અસર નહીં થાય.
- પ્રોજેક્ટ હેઠળ બે રસ્તા (7 કિલોમીટર અને 1.3 કિલોમીટર) પણ બનાવવામાં આવશે.

સ્ટ્રેટેજી માટે આ ટનલ કઈ રીતે મહત્વની છે?

- સેલા પાસ 317 કિલોમીટર લાંબી બાલીપારા-ચાહરદ્વાર-તવાંગના રસ્તે છે.
- આ પાસ અરુણાચલ પ્રદેશના પશ્ચિમ કામેંગ, પૂર્વ કામેંગ અને તવાંગ જિલ્લાને દેશના બાકી ભાગો સાથે જોડનારો એકમાત્ર રસ્તો છે.
- તવાંગ સેક્ટરમાં LAC સુધી પહોંચવા માટે આ એક માત્ર રસ્તો છે. ખરાબ હવામાનમાં હેલિકોપ્ટર પણ ઉડી નહોતા શકતા.
- આ રસ્તો તમામ હવામાનમાં ખુલ્લો રહેશે જેથી સ્થાનિક લોકો સાથે ભારતીય સેનાની પણ મૂવમેન્ટ સરળતાથી થઈ શકે.
- લદ્દાખ અને અરુણાચલ પ્રદેશમાં ચીની સેના તરફ અતિક્રમણને જોતા આ સુરંગનું મહત્વ વધી ગયું છે.

સુરંગ પ્રોજેક્ટની આધારશિલા ફેબ્રુઆરી 2019માં વડાપ્રધાન નરેન્દ્ર મોદીએ રાખી હતી. આ પ્રોજેક્ટ પર લગભગ 700 કરોડ રૂપિયાનો ખર્ચ થવાનું અનુમાન છે. સેલા સુરંગ પ્રોજેક્ટ આગામી ત્રણ વર્ષમાં પૂર્ણ થવાની સંભાવના છે.