'પોલીસના બકરા'થી પરેશાન પરિવાર, રોજ ખાઈ જાય છે 200 રુપિયાનો ચારો

વિવેક કુમાર, દનકૌર: ઉત્તર પ્રદેશના દનકૌરના બિલાસપુર શહેરમાં રહેતો એક પરિવાર 'પોલીસના બકરા'થી ખૂબ જ પરેશાન થઈ ગયો છે. પોલીસનો બકરો...!!! તમે વિચારતા હશો કે પોલીસ ક્યારથી બકરા પાળવા લાગી? હકીકતમાં, ત્રણ દિવસ પહેલા બકરાની ચોરી કર્યા બાદ ચોર તેને સાથે લઈ જઈ રહ્યા હતાં. જેવું ચોરે પોલીસને જોયા તો તેઓ બકરાને બજારમાં મૂકીને ભાગી છૂટયા. હવે સવાલ એ ઉભો થયો કે, આ બકરાને ક્યાં રાખવો? પોલીસે આ બકરાને એક પરિવારને ત્યાં રાખ્યો અને તેની સંભાળ રાખવા કહ્યું હતું.

રોજ 200 રુપિયાનું 'ભોજન' આરોગી જાય છે બકરો
પરિવારે જણાવ્યું કે બકરો રોજ આશરે 200 રુપિયાનું 'ભોજન' ઝાપટી જાય છે અને આ સાથે જ તેણે ઘરમાં ગંદકી ફેલાવીને રાખી છે. બકરાના કારણે પરિવાર પોતાનું કામ પણ કરી શકતો નથી અને તેની સંભાળ રાખવામાં પણ ખૂબ જ પરેશાની થઈ રહી છે.

બજારમાં બકરો મૂકી ફરાર થયા ચોર
બિલાસપુર વિસ્તારમાં મંગળવારે મોડી રાત્રે બે યુવકો એક બકરાને લઈને બાઈક પર જઈ રહ્યા હતા. આ અંગે પોલીસને જાણ થઈ હતી. બિલાસપુર પોલીસ ચોકી પર તૈનાત પોલીસકર્મચારીઓ ઘટના સ્થળે પહોંચી ગયા હતા. પોલીસને જોઈને બાઈક સવાર બકરાને બજારમાં મૂકીને સ્થળ પરથી ફરાર થઈ ગયા હતા. પોલીસ બકરાને બિલાસપુર ચોકી પર લાવ્યા હતાં ત્યારબાદ નજીક રહેતા પરિવારને બકરાની સારસંભાળ રાખવા કહ્યું હતું.

'...તો પોલીસ ચોકીમાં બાંધી દેશું બકરો'
પીડિત પરિવારનું કહેવું છે કે પોલીસે તેમને એવું કહ્યું કે જ્યાં સુધી બકરાના માલિકનો પત્તો ન મળી જાય અને તે પોતાના ઘરે ન લઈ જાય ત્યાં સુધી બકરાને તેમના ઘરે જ રાખવો પડશે. હવે પીડિત પરિવારનું કહેવું છે કે, જો પોલીસ બકરાને નહીં લઈ જાય તો પોલીસ ચોકીની અંદર જ તે બકરાને બાંધી દેશે.