પ્રદર્શનકારી ખેડૂતે તરસ્યા પોલીસકર્મીને પાણી પીવડાવ્યું, ફોટોએ જીત્યું લોકોનું દિલ

કૃષિ કાયદાના વિરોધમાં દિલ્હી કૂચ કરનારા આંદલનકારી ખેડૂતોને શાંતિપૂર્ણ રીતે પ્રદર્શન કરવાની મંજૂરી મળી ગઈ છે. ખેડૂતોનો સાથે આપવામાં સોશિયલ મીડિયા પર ઘણા સેલેબ્સ સામે આવી રહ્યા છે. સતત ખેડૂતોના પક્ષમાં પોસ્ટ નાખી રહ્યા છે. એવામાં બિગ બોસ 13ના કન્ટેસ્ટન્ટ તહસીન પૂનાવાલાએ પણ એક ફોટો પોસ્ટ કર્યો છે. જેમાં એક ખેડૂત એક જવાનને પાણી પીવડાવી રહ્યો છે. આ તસવીર લોકોને ખૂબ ધ્યાન આકર્ષી રહી છે.

તહસીન પૂનાવાલાએ આ ફોટો ટ્વીટ કરીને લખ્યું, 'આ ભારત છે... આ મારા ખેડૂત અને મારી પોલીસ છે... નીચલી રેન્કની પોલીસને પણ ખબર છે કે નરેન્દ્ર મોદીજી તેમના બોસને ખેડૂતો વિરુદ્ધ યુદ્ધ કરવા માટે મજબૂર કરી રહ્યા છે, જેમ કે આપણા ખેડૂતો આતંકવાદી હોય! #FarmersProtest.' તહસીન પૂનાવાલાએ આ રીતે ખેડૂતોના પક્ષમાં ટ્વીટ કર્યું છે અને પીએમ મોદી પર નિશાન સાધ્યું છે. જણાવી દઈએ કે તસસીન પૂનાવાલાના આ ટ્વીટ પર યુઝર્સના ઘણા બધા રિએક્શન આવી રહ્યા છે.

ઉલ્લેખનીય છે કે પ્રદર્શનકારી ખેડૂતોને શાંતિપૂર્ણ રીતે પ્રદર્શન કરવાની અનુમતી મળી ગઈ છે. દિલ્હી પોલીસ દ્વારા આ ખેડૂતોને શાંતિપૂર્ણ રીતે પ્રદર્શન કરવા બુરાડી મેદાનમાં બેસવાની મંજૂરી આપવામાં આવી છે. આ ઉપરાંત તમામ ખેડૂતોને શાંતિ બનાવી રાખવાની અપીલ કરવામાં આવી છે. પરમિશન મળ્યા બાદ હવે ખેડૂતો બુરાડી પોતાના ટ્રેક્ટર અને ગાડીઓથી જઈ રહ્યા છે. ખેડૂતોને કહેવાયું છે કે તેઓ દિલ્હી આવી શકે છે.

નોંધનીય છે કે હરિયાણા-પંજાબના ખેડૂતોનું સમર્થન કરતા વેસ્ટ યુપીમાં પણ ખેડૂતો રસ્તા પર ઉતર્યા. મેરઠ, મુઝફ્ફરનગર, બાગપત, બિજનૌર, શામલી, બુલંદશહર, મથુરા, આગરા અને મુરાદાબાદથી પસાર થતા રસ્તાઓ જામ કરી દેવાયા. એનએચ-58, દિલ્હી-દેહરાદૂન હાઈવે અને યમુના એક્સપ્રેસ-વે પર કેટલાક કલાકો માટે ટ્રાફિક અટકી ગયો હતો. બીજી તરફ પંજાબના ખેડૂત નેતાઓએ શુક્રવારે જણાવ્યું કે, શનિવારે બેઠક કરીને આગળના નિર્ણયનોની ચર્ચા કરાશે.