2021ની શરુઆતમાં ભારતમાં આવશે ઓક્સફોર્ડની કોરોના રસી, અડધી કિંમતે ખરીદશે સરકાર

નવી દિલ્હીઃ ભારત સરકાર દેશની વસ્તીના ચાર જૂથોને પ્રાધાન્યતાના આધારે કોરોના વાયરસની રસી અપાવવા માગે છે. આ માટે લગભગ 50 થી 60 કરોડ ડોઝની જરૂર પડશે. કોરોના વાયરસની રસી દેશના પ્રથમ હરોળના આરોગ્ય કર્મચારીઓ માટે જાન્યુઆરીમાં અથવા ફેબ્રુઆરીની શરૂઆતમાં મળી શકે છે. આ ઉપરાંત સરકાર સીરમ ઇન્સ્ટિટ્યૂટ ઓફ ઈન્ડિયા (SII) ની રસીને ઇમર્જન્સીના સમયે ઉપયોગની મંજૂરી આપવાની તૈયારીમાં છે. જોકે ઓક્સફર્ડ-એસ્ટ્રાઝેનેકા આ રસીને યુકેમાં ઇમર્જન્સી દરમિયાન ઉપયોગ માટે મંજૂરી મેળવા અંગે રાહ જોવામાં આવી રહી છે. ભારતમાં ઓક્સફર્ડ-એસ્ટ્રાઝેનેકાની રસી કોવિશિલ્ડ માટે SII અને ઓક્સફર્ડ-એસ્ટ્રાઝેનેકા વચ્ચે ભાગીદારી છે. તેમજ દેશમાં બનેલી ભારત બાયોટેકની કોરોના રસી કોવાક્સિનને પણ ફેબ્રુઆરી સુધીમાં ઇમર્જન્સીમાં ઉપયોગ માટે મંજૂરી આપી શકાય છે. એટલે કે, 2021 ફેબ્રુઆરી સુધીમાં કોવિડ -19 ની બે રસી દેશમાં ઉપલબ્ધ થઈ શકે છે.

સીરમ ઇન્સ્ટિટ્યુટ ભારતીય રેગ્યુલેટર સામે ડિસેમ્બરમાં ઇમર્જન્સીમાં ઉપયોગની મંજૂરી માટે અરજી કરી શકે છે. એક અધિકારીએ જણાવ્યું હતું કે, જો બધું યોજના મુજબ ચાલે અને ડિસેમ્બરમાં કંપનીને ઇમરજન્સી ઉપયોગ માટે મંજૂરી મળે છે, તો અમે જાન્યુઆરી-ફેબ્રુઆરીમાં રસીની પહેલી બેચની અપેક્ષા રાખી રહ્યા છીએ. SIIએ રસીના ફેઝ 3નું ટ્રાયલ લગભગ પૂર્ણ કરી લીધું છે અને ડેટા પર ફોલો-અપ ઝડપી થઈ શકાય છે. ભારતમાં આ રસી 'કોવિશિલ્ડ' નામથી ઉપલબ્ધ થશે.

તો બીજી તરફ સ્વદેશી ભારત બાયોટેકની કોરોના રસી Covaxinને પણ 1 અને 2 તબક્કાના ડેટા સબમિટ કર્યા પછી કટોકટી મંજૂરી આપી શકાય છે. સૂત્રોના જણાવ્યા અનુસાર, ફેઝ 3 ટ્રાયલ હેઠળની રસી માટેનો ડેટા તૈયાર કરવામાં આવી રહ્યો છે. એક અધિકારીએ કહ્યું, "જો સીરમ ઇન્સ્ટિટ્યૂટ યુકેના કાર્યક્ષમતાના ડેટા સબમિટ કરે છે, તો તેને સરળતાથી મંજૂરી આપી શકાય છે. ભરત બાયોટેકના કિસ્સામાં પણ, જો કંપની અરજી કરે છે તો 1 અને 2 તબક્કાના ડેટાના આધારે મંજૂરી આપી શકાય છે. આનો અર્થ એ છે કે જો ટ્રાયલમાં બધું બરાબર રહે છે, તો જૂન મહિના સુધીમાં એક કરતા વધુ રસી મળી શકે છે.

સરકારે પ્રાથમિક્તાના આધારે પહેલા 25-30 કરોડની વસ્તીને રસી આપવાની યોજના બનાવી છે. આ માટે 50 થી 60 કરોડ ડોઝની જરૂર પડશે. જાન્યુઆરી-ફેબ્રુઆરીમાં, દેશભરમાં 70 લાખ આરોગ્ય કર્મચારીઓ અને 2 કરોડથી વધુ ફ્રન્ટલાઈન કર્મચારીઓ પોલીસ, મ્યુનિસિપલ કોર્પોરેશન, સૈન્ય વગેરેને રસી આપવાની યોજના છે. લાભાર્થીઓની પ્રથમ યાદી તૈયાર કરવામાં આવી છે.

કેન્દ્ર સરકાર રસી ઉત્પાદકોના સંપર્કમાં છે. સરકાર મોટા જથ્થામાં રસી ખરીદશે તેથી ભાવતાલ પણ કરવામાં આવ્યો હોવાનું કહેવાય છે. એક સત્તાવાર સૂત્ર અનુસાર SIIની રસી કિંમત 500 થી 600 રૂપિયાની વચ્ચે રહેશે જેને સરકાર લગભગ અડધા ભાવે મેળવશે.