ભારતમાં કોરોના વાયરસથી સૌથી વધુ અસરગ્રસ્ત 5 રાજ્યો, જ્યાં છે 62% એક્ટિવ કેસ

નવી દિલ્હીઃ કેન્દ્ર સરકારે મંગળવારે 5 રાજ્યોનો ઉલ્લેખ કર્યો જ્યાં દેશના કુલ કેસના 62% એક્ટિવ કેસ રહેલા છે, જેમાં મહારાષ્ટ્રમાં સૌથી વધારે કેસ છે. દેશમાં કોરોના વાયરસના કેસને વધતા અટકાવવા માટે ટેસ્ટની સંખ્યામાં પણ સતત વધારો કરવામાં આવી રહ્યો છે.

આ પાંચ રાજ્યો એટલે મહારાષ્ટ્ર, આંધ્રપ્રદેશ, કર્ણાટકા, ઉત્તરપ્રદેશ અને તામિલનાડુ છે જ્યાં કુલ કેસના 62% એક્ટિવ કેસ અને 72% કોરોનાના દર્દીઓના મોત થયા છે.

ભારતમાં કોરોના વાયરસના કુલ કેસનો આંકડો 4,280,422 થઈ ગયો છે. જેમાંથી દેશમાં 8,83,697 એક્ટિવ કેસ છે. આ સાથે કુલ 72,775 દર્દીઓના મોત થઈ ગયા છે. મહારાષ્ટ્રમાં દેશના કુલ એક્ટિવ કેસમાંથી 26.8% છે, જેનો આંકડો 2.3 લાખ થાય છે, જ્યારે કુલ પોઝિટિવ કેસ 9.2 લાખ છે. બીજી તરફ તામિલનાડુમાં 5.8% એક્ટિવ કેસ છે, જે 51,200 થાય છે.

14 જેટલા રાજ્યો અને કેન્દ્ર શાસિત પ્રદેશોમાં એક્ટિવ કેસનો આંકડો 5000 કરતા પણ ઓછા છે.

જે 5 રાજ્યો એક્ટિવ કેસમાં ટોપ પર છે તેમાં ઉત્તરપ્રદેશમાં બાકી 4 રાજ્યો કરતા મોટા પ્રમાણમાં દરરોજ ટેસ્ટિંગ કરવામાં આવી રહ્યા છે. પાછલા 24 કલાકમાં થયેલા ટેસ્ટમાં 25માંથી 1 કેસ ઉત્તરપ્રદેશમાં પોઝિટિવ આવી રહ્યો છે, જ્યારે મહારાષ્ટ્રમાં 5માંથી એકટ ટેસ્ટ પોઝિટિવ આવી રહ્યો છે.

મંગળવારે ફરી એકવાર પોઝિટિવ કેસની સંખ્યામાં ઉછાળો નોંધાયો છે, જેમાં 89,000 જેટલા નવા કેસ નોંધાયા છે, જે સોમવારે નોંધાયેલા કેસ કરતા 1,125 વધુ છે.