પહેલીવાર હિન્દુ યુવક ઈસ્લામિક સ્ટડીઝની પ્રવેશ પરીક્ષામાં આખા દેશમાં ટોપ આવ્યો

જયપુર: પહેલીવાર દેશમાં સેન્ટ્રલ યુનિ.માં ચાલતા ઈસ્લામિક સ્ટડીઝની પ્રવેશ પરીક્ષામાં કોઈ બિનમુસ્લિમ ઉમેદવાર પ્રથમ આવ્યો છે. રાજસ્થાનના અલવર જિલ્લાના શુભમ યાદવ (ઉં. 21 વર્ષ) એ આ બહુમાન મેળવ્યું છે. દિલ્હી યુનિ.માં ફિલોસોફીમાં ગ્રેજ્યુએટ થયેલો શુભમ હવે ઈસ્લામને ઉંડાણપૂર્વક સમજવા તેનો અભ્યાસ કરશે.

શુભમનું કહેવું છે કે ઈસ્લામને લઈને ઘણી ગેરસમજ છે. દુનિયાના ઘણા નેતાઓ ઈસ્લામ પર વાત કરતા હોય છે, જેના કારણે જ તેમાં પોસ્ટ-ગ્રેજ્યુએશન કરવાની પોતાને પ્રેરણા મળી હોવાનું તેનું કહેવું છે. આ સિવાય હાલના સમયમાં મોટાપાયે ધ્રૂવીકરણ થઈ રહ્યું છે ત્યારે શુભમ બે કોમ વચ્ચેનો સેતુ બનવા પણ માગે છે.

IAS ઓફિસર બનવાનું સ્વપ્ન ધરાવતો શુભમ માને છે કે યુપીએસસીની તૈયારીમાં આ સબ્જેક્ટ તેને ખૂબ જ મદદરુપ બનશે. શુભમના પિતા વેપારી છે, અને તેના માતા ગૃહિણી છે. તેના ઈસ્લામિક સ્ટડીઝમાં એડમિશન લેવાના નિર્ણયને તેના પિતાનો પણ ટેકો છે.

જોકે, આ અભ્યાસ માટે શુભમને કાશ્મીર જવું પડશે. દેશમાં 14 સેન્ટ્રલ યુનિ. આવેલી છે, જેમાંથી માત્ર કાશ્મીરમાં જ આ વિષય ભણાવાય છે. જેના માટે શુભમ બે વર્ષ કાશ્મીરમાં રહેશે. તેનું કહેવું છે કે તે કાશ્મીરમાં રહી ચૂક્યો છે, અને ત્યાંના લોકો ખૂબ જ મિલનસાર સ્વભાવ ધરાવે છે. તેનું માનવું છે કે કોઈ સમુદાય પ્રત્યે કોઈ ગેરસમજ રાખવી ના જોઈએ.

રાજસ્થાનમાં આવેલી જગદગુરુ રામચંદ્રાચાર્ય રાજસ્થાન સંસ્કૃત યુનિ.માં ઘણા મુસ્લિમ PhD કરે છે. જેને અહીંના હેડ ઓફ ધ ડિપાર્ટમેન્ટ શાસ્ત્રી કોશલેન્દ્ર દાસ એક આવકારદાયક પહેલ ગણાવે છે. બીજા સમુદાયના લોકો પણ સંસ્કૃતનો અભ્યાસ કરે છે. જેનાથી બે કોમ વચ્ચેનું અંતર ઓછું કરવામાં મદદ મળશે તેવું પણ તેમનું કહેવું છે.

રાજસ્થાન યુનિ.ના ઉર્દુ ડિપાર્ટમેન્ટના બે આસિસ્ટન્ટ પ્રોફેસર હિન્દુ છે. જેમાં રશ્મી જૈન અસોસિએટ પ્રોફેસર જણાવે છે કે અભ્યાસનો હેતુ નોકરી મેળવવાનો હોય કે પછી માત્ર રસ, પરંતુ હાલના દિવસોમાં માત્ર ધર્મના આધારે અભ્યાસ કરવાને બદલે પરિવર્તન જોવા મળી રહ્યું છે.