પૂર્વ રાષ્ટ્રપતિ પ્રણવ મુખર્જીની તબિયત વધુ લથડી, ફેફસામાં લાગ્યું ઈન્ફેક્શન

નવી દિલ્હી: પૂર્વ રાષ્ટ્રપતિ પ્રણવ મુખર્જીની તબિયત વધુ લથડી છે. હાલ દિલ્હીની આર્મી રિસર્ચ એન્ડ રેફરલ હોસ્પિટલમાં એડમિટ મુખર્જીના ફેફસામાં ઈન્ફેક્શન લાગ્યું હોવાનું જાણવા મળી રહ્યું છે. 84 વર્ષીય પ્રણવ મુખર્જી 10 ઓગસ્ટથી હોસ્પિટલમાં એડમિટ છે, અને તેમને વેન્ટિલેટર પર રાખવામાં આવ્યા છે.

જો કે તેમના દીકરા અને પૂર્વ સાંસદ અભિજિત મુખર્જીએ તેમના પિતા રિકવરી દર્શાવી રહ્યા હોવાનું જણાવ્યું છે. પ્રણવ મુખર્જીના મગજમાં લોહી જામી ગયું હતું, જેને દૂર કરવા માટે તેમના પર સર્જરી કરવામાં આવી હતી અને ત્યારથી તેઓ કોમામાં છે. તેમનો કોરોના રિપોર્ટ પણ પોઝિટિવ આવ્યો હતો.

હોસ્પિટલે આપેલી સત્તાવાર માહિતી અનુસાર, પૂર્વ રાષ્ટ્રપતિના ફેફસામાં ઈન્ફેક્શનના લક્ષણો જોવા મળી રહ્યા છે. તેઓ હજુય વેન્ટિલેટર સપોર્ટ પર છે, અને સ્પેશિયાલિસ્ટ ડોક્ટર્સની ટીમ દ્વારા તેમની સારવાર કરવામાં આવી રહી છે. મુખર્જીના પુત્રએ એક ટ્વીટમાં તેમની સ્થિતિ કાબૂમાં હોવાનું જણાવ્યું હતું.

અભિજિત મુખર્જીએ પોતાના ટ્વીટમાં કહ્યું હતું કે ડોક્ટરોના પ્રયાસ અને સારવારથી મારા પિતા હાલ સ્ટેબલ છે. તેમની સ્થિતિ એકંદરે કાબૂમાં છે, અને તેઓ ઈમ્પ્રુવમેન્ટ દર્શાવી રહ્યા છે. તેમણે તેમના ઝડપથી સાજા થઈ થવા લોકોને પ્રાર્થના કરવા પણ અપીલ કરી હતી.