એમેઝોન સાથે ચાર ગઠિયાઓએ આ રીતે કરી 70 લાખની ઠગાઈ

બેંગલુરુ: ઓનલાઈન વસ્તુઓ વેચતી વેબસાઈટ એમેઝોન સાથે ચાર લોકોએ 70 લાખ રુપિયાની ઠગાઈ કરી હોવાનો ચોંકાવનારો મામલો બહાર આવ્યો છે. ઠગાઈ કરનારા બે શખ્સો એમેઝોનને સર્વિસ આપતી એક કંપનીમાં કામ કરતા હતા, અને ડેમેજ કે હલકી ક્વોલિટીની વસ્તુ ગ્રાહક પાછી મોકલે તો તેનું રિફંડ તેઓ જ આપતા હતા. એમેઝોનની રિફંડ પોલિસીનો ગેરલાભ ઉઠાવતા એમેઝોન માટે કામ કરતા અનવર અને નાયક નામના બે શખ્સોએ રવિ અને સોનુ નામના અન્ય બે લોકોની સાથે મળીને કેટલીક વસ્તુઓ ઓર્ડર કરી હતી. જોકે, આ ગઠિયા જે વસ્તુ એમેઝોનમાંથી આવતી તેને બદલીને તેના બદલે ડુપ્લિકેટ વસ્તુ મૂકી દેતા હતા, અને પછી તેને રિટર્ન કરી રિફંડ લઈ લેતા હતા. પોલીસ ફરિયાદ અનુસાર, આ ચાર ગઠિયાઓની ગેંગે કુલ 854 વસ્તુઓ એમેઝોન પરથી ઓર્ડર કરી તેના બદલે નકલી વસ્તુઓ મોકલીને રિટર્ન કરી હતી. જેના કારણે એમેઝોનને 70 લાખ રુપિયાનું નુક્સાન થયું હતું. એમેઝોનના સ્ટાફે જે વસ્તુઓ મોકલાઈ હતી, અને જે વસ્તુઓ રિટર્ન આવતી હતી તેમનું ક્રોસ ચેકિંગ કરતા આ આખોય મામલો સામે આવ્યો હતો.