કારમાં આગળ બેઠેલા લોકોની સુરક્ષા માટે 1 એપ્રિલથી બે એરબેગ ફરજિયાત બનાવાશે

નવી દિલ્હીઃ હવે નવી કારમાં આગળની બન્ને સીટમાં એપ્રિલથી એરબેગ ફરજિયાત કરવામાં આવી શકે છે, જેથી આગામી 1 જૂનથી આવનારી કારમાં એરબેગ હોવી ફરજિયાત થઈ જશે. આ અંગે સોમવારે રોડ અને ટ્રાન્સપોર્ટ મંત્રાલય દ્વારા પ્રસ્તાવ તૈયાર કરવામાં આવ્યો છે.

મંત્રાલય દ્વારા જણાવવામાં આવ્યું કે, આ નિયમ તમામ કાર માટે લાગુ કરવામાં આવશે, મુસાફરોની સુરક્ષાને ધ્યાનમાં રાખીને આ નિર્ણય લેવામાં આવ્યો છે. કેન્દ્રીય રોડ અને ટ્રાન્સપોર્ટ મંત્રી નીતિન ગડકરીએ જણાવ્યું કે, સરકાર મુસાફરોની સુરક્ષા સાથે કોઈ સમાધાન કરવા નથી માગતી. ડ્રાઈવર માટે 1 જુલાઈ 2019થી એરબેગ ફરજિયાત બનાવવામાં આવી હતી.

આગળ સીટ્સમાં માત્ર ડ્રાઈવર તરફ જ એરબેગ હોવાના કારણે ગંભીર અકસ્માત દરમિયાન ડ્રાઈવરની બાજુમાં બેઠેલા મુસાફરને ગંભીર ઈજાઓ થવાની સંભાવનાઓ રહેલી છે. જેને ધ્યાનમાં રાખીને આ મહત્વનો નિર્ણય લેવામાં આવ્યો છે.

અમારા સહયોગી ટાઈમ્સ ઓફ ઈન્ડિયા (TOI) દ્વારા સૌથી પહેલા 18 ડિસેમ્બરે અહેવાલ રજૂ કરવામાં આવ્યો હતો કે, સરકાર વાહન માટે આ જરુરી ફેરફાર કરવા અંગે વિચારી રહી છે.

આ અંગેની તૈયારી પાછલા ત્રણ વર્ષથી ચાલતી હતી કે કારમાં આગળ બેઠેલા લોકોની સુરક્ષા માટે મહત્વના પગલા ભરવા જરુરી છે. પરંતુ તે પછી પાછલા વર્ષે એરબેગ માત્ર ડ્રાઈવર સીટ માટે ફરજિયાત બનાવવામાં આવી હતી.

આ પ્રમાણે પાછલા વર્ષે મંત્રાલય દ્વારા મુસાફરોની સુરક્ષાને ધ્યાનમાં રાખીને વિચાર કરવામાં આવ્યો હતો, જે પછી આ વર્ષે તે અંગે મહત્વનો નિર્ણય લેવામાં આવ્યો છે. જેમાં ડ્રાઈવરની સાથે આગળ બેઠેલા મુસાફર માટે પણ એરબેગ ફરજિયાત બનાવવા અંગેની પ્રક્રિયા હાથ ધરવામાં આવી રહી છે.