વર્ષ 2011માં ભારતીય જનતા પાર્ટીના કલકત્તા જીલ્લા અધ્યક્ષ તેમજ ફિલ્મમેકર સંઘમિત્રા ચૌધરીએ અપકમિંગ અભિનેત્રી અર્પિતા મુખર્જીને એક ડોક્યુ-ફીચર ફિલ્મ માટે કાસ્ટ કરી હતી. સંઘમિત્રા જણાવે છે કે, તે ફિલ્મમાં યંગસ્ટર્સના એક ગ્રુપની વાત હતી. અર્પિતા પણ તેમાંની એક હતી. તે સમયે અર્પિતાની ઓળખ એક ભોળી યુવતી તરીકેની હતી, જેની ફેશન સેન્સ ઘણી સારી હતી. તે એક રૂઢિચુસ્ત પરિવારથી આવતી હતી. તેની પાસે પોતાની કાર પણ નહોતી. તે શૂટ માટે પબ્લિક ટ્રાન્સપોર્ટના માધ્યમથી આવતી હતી. ભારતીય જનતા પાર્ટીમાં જોડાયા પછી સંપર્ક છૂટી ગયો હતો. હવે જ્યારે તેના ફ્લેટ પરથી અઢળક સંપત્તિ મળી આવી હોવાની ખબર સામે આવી રહી છે, તે ખરેખર ચોંકાવનારી બાબત છે.
ઉલ્લેખનીય છે કે તાજેતરમાં જ જ્યારે ઈડી દ્વારા દરોડા પાડવામાં આવ્યા અને અર્પિતા મુખર્જીના ફ્લેટ પરથી લગભગ 50 કરોડ રુપિયા મળી આવ્યા તો દેશભરમાં એક જ પ્રશ્ન થઈ રહ્યો છે કે, આખરે એક સામાન્ય મોડલ અને સ્ટ્રગલિંગ અભિનેત્રી પાસે આટલી મોટી રકમ કેવી રીતે આવી? સોશિયલ મીડિયા પર લોકો અર્પિતાને કેશ ક્વીન કહીને બોલાવે છે. પશ્ચિમ બંગાળ સરકારના પૂર્વ મંત્રી પાર્થ ચેટર્જીના સહયોગી અને નજીકના વ્યક્તિ તરીકે ઓળખાતી અર્પિતા મુખર્જીનો જન્મ એક મધ્યમવર્ગીય પરિવારમાં થયો હતો.
આર્ટ્સમાં સ્નાતક ડિગ્રી મેળવ્યા પછી અર્પિતાએ વર્ષ 2003થી ફ્રીલાન્સ મોડલ તરીકે કામ શરુ કર્યું. 2008માં તેને બંગાળી ફિલ્મોમાં નાના-મોટા રોલ ઓફર થવા લાગ્યા. અર્પિતાને ત્રણ ફિલ્મોમાં ડાઈરેક્ટ કરનાર ડિરેક્ટર અનુપ સેનગુપ્તા જણાવે છે કે, હું મારી ફિલ્મ Mama Bhagne માટે અભિનેત્રીની મિત્રના રોલ માટે શોધ કરી રહ્યો હતો ત્યારે મારી મુલાકાત કોઈએ અર્પિતા સાથે કરાવી હતી. અર્પિતા તે રોલ માટે શ્રેષ્ઠ હતી. મેં તેની સાથે બીજી પણ બે ફિલ્મો કરી હતી. તે સમયે તે સેકન્ડ કાર લઈને શૂટ પર આવતી હતી. ઉલ્લેખનીય છે કે, સૂત્રોના જણાવ્યા અનુસાર અર્પિતા અત્યારે 3 લક્ઝરી કારની માલિક છે.
વર્ષ 2008માં તેણે ઓડિયા ફિલ્મ ઈન્ડસ્ટ્રીમાં પ્રવેશ કર્યો. તે જ સમયે તેણે ટોલિવૂડમાં પણ પ્રવેશ કર્યો. તેણે Bande Utkala Janani નામની ફિલ્મમાં સુપરસ્ટાર સિદ્ધાંત મોહાપાત્રા અને સબ્ચસાચી મિશ્રા સાથે લીડ રોલ કર્યો હતો. ફિલ્મ હિટ ગઈ અને અર્પિતાને બીજા રોલ પણ મળ્યા હતા. સૂત્રોના જણાવ્યા અનુસાર, અર્પિતાએ 2012 સુધી ઓડિયા અને બંગાળી સિનેમામાં કામ કર્યું. ત્યારપછી તેણે ટોલીવૂડમાં કામ કરવાનો નિર્ણય લીધો. ત્યારપછી તે પાર્થ ચેટર્જીના સંપર્કમાં આવી. ત્યારપછી અર્પિતાએ કલકત્તાના ત્રણ અલગ અલગ વિસ્તારોમાં નેઈલ સલૂન ખોલ્યા.
પ્રોડ્યુસર ગૌતમ સાહા જણાવે છે કે, તે ખૂબ મહેનત કરતી હતી. પાછલા થોડા સમયથી હું તેને મંત્રી પાર્થ ચેટર્જી સાથે જોતો હતો, મને લાગ્યું કે તેનું ભવિષ્ય સારું છે. પણ નસીબે તેના માટે કંઈક આવુ લખ્યું હશે. ઉલ્લેખનીય છે કે અર્પિતાની ધરપકડ કર્યા પછી EDએ તેના પૈતૃક નિવાસસ્થાન પર પણ દરોડા પાડ્યા હતા. અર્પિતાની બહેન અને બનેવીને પણ પ્રશ્નો કરવામાં આવ્યા હતા. તેના બનેવી કલ્યાણ ધારે જણાવ્યું કે તે માત્ર ડ્રાઈવર તરીકે કામ કરતો હતો જેનો પગાર 18000 રુપિયા છે.
ઈડીની પૂછપરછમાં અર્પિતાએ જણાવ્યું કે, જે ઓરડાઓમાં સંપત્તિ રાખવામાં આવી હતી તેમાં જવાની મંજૂરી તેની પાસે નહોતી. પાર્થ ચેટર્જી જ તે રુમમાં જતા હતા. અર્પિતાએ જણાવ્યું કે તે રુમમાં શું છે તેની કોઈ જાણકારી તેને નહોતી.