CBSEની ટોપરનું અપહરણ કરી ત્રણ નરાધમોએ ગુજાર્યો ગેંગરેપ

I am Gujarat

હરિયાણાના મહેન્દ્રગઢ જિલ્લાની ઘટના

રેવાડી: હરિયાણાના મહેન્દ્રગઢ જિલ્લામાં 19 વર્ષની યુવતી પર ગેંગરેપની હચમચાવી મૂકતી ઘટના સામે આવી છે. આરોપ છે કે, મહેન્દ્રગઢના કનિનામાં 3 નરાધમોએ 19 વર્ષની યુવતીનું કથિત રીતે અપહરણ કર્યુ અને તેની પર દુષ્કર્મ કર્યું. આ જાણકારી પોલીસે ગુરુવારે આપી. જોકે, આ મામલે હજુ સુધી કોઈની ધરપકડ કરવામાં આવી નથી. પીડિતા CBSE ટોપર રહી ચૂકી છે.

લિફ્ટ આપવાનું કહી કારમાં બેસાડી અને..

પોલીસે જણાવ્યું કે, યુવતીનું આરોપીઓએ બુધવારે કથિત રીતે અપહરણ કરી લીધું. એ સમયે યુવતી કોચિંગ માટે પોતાના ઘરેથી નીકળી હતી. થોડે દૂર આરોપીઓ કારમાં આવ્યા અને તેને લિફ્ટ આપવાની વાત કરી. કેમકે, આરોપી યુવતીના ગામના રહેવાસી હતા, એટલે તે તેમને ઓળખતી હતી. આરોપી યુવીને લિફ્ટ આપીને તેને એક સૂમસામ સ્થળ પર લઈ ગયાં, જ્યાં તેને નશીલું પીણું પીવડાવી તેના પર સામૂહિક દુષ્કર્મ કર્યું.

પોલીસ શું કહે છે?

એડીજીપી ઓપરેશન એએસ ચાવલા મુજબ, ‘જેવું કે પીડિતાએ જણાવ્યું છે કે તેને તેના ગામના બે યુવકો અપહરણ કરીને નજીકની જગ્યા પર લઈ ગયા હતા. ત્યાં તેને કંઈક પીવાનું આપવામાં આવ્યું, તે પછી તે બેભાન થઈ ગઈ અને પછી તેને કંઈક યાદ નથી. જ્યારે તે હોશમાં આવી તો ત્યાં અન્ય એક છોકરો હતો. તેમણે તેને પાછી મૂકી દીધી અને તેના પેરેન્ટ્સને કોલ કરી તેનું લોકેશન બતાવ્યું. મામલામા 3 શખસો સામે ફરિયાદ નોંધવામાં આવી છે. અમે તેમની શોધખોળ કરી રહ્યા છીએ. પીડિતાનું મેડિકલ ચેકઅપ થઈ ચૂક્યું છે.’

હરિયાણાના પૂર્વ મુખ્યમંત્રીએ માંગ્યું સરકારનું રાજીનામું

મામલામાં કાર્યવાહી માટે હરિયાણા સરકાર કડક જોવા મળતી નથી. મુખ્યમંત્રી મનોહર લાલ ખટ્ટરે કહ્યું કે, ‘કાયદો તેનું કામ કરશે અને દોષિઓને સજા મળશે.’ તો હરિયાણાના પૂર્વ મુખ્યમંત્રી ભૂપિન્દર સિંહ હુડ્ડાએ કહ્યું કે, ‘રાજ્યમાં કાયદો-વ્યવસ્થા સંપૂર્ણ નિષ્ફળ થઈ ગયા છે. સરકારે નૈતિકતાના આધાર પર રાજીનામું આપી દેવું જોઈએ.’