રોજ 36 કિલોમીટર સાઈકલ ચલાવી સ્કૂલે જતી છોકરી બોર્ડની પરીક્ષામાં જિલ્લામાં ટોપ આવી

બોર્ડની પરીક્ષામાં હવે તો જાણે 90 ટકા લાવવા પણ કોઈ નવાઈની વાત નથી રહી. જોકે, કેટલાક સ્ટૂડન્ટ્સ એવા પણ હોય છે કે જેઓ પારાવાર ગરીબી અને સંઘર્ષ સામે લડીને પણ એવું પરિણામ હાંસલ કરતા હોય છે કે લોકોને તેમના પર માન ઉપજે છે. આવી જ એક સ્ટૂડન્ટ છે યુપી બોર્ડમાં 87.20 ટકા લાવનારી આયુષી. જે સ્કૂલે જવા આવવા માટે રોજ 36 કિમી સાઈકલ ચલાવતી હતી.ઝાંસી જિલ્લામાં ટોપ આવનારી આયુષીની કહાની સામાન્ય વિદ્યાર્થીઓથી ઘણી અલગ છે. ખેડૂત પિતાની દીકરી આયુષી ઝાંસી જિલ્લાના અરૌલી ગામની રહેવાસી છે. તેના ગામથી સ્કૂલ 18 કિલોમીટર દૂર હતી. વળી, ત્યાં બસ કે બીજા કોઈ સાધનમાં જવું શક્ય ના હોવાથી તેની પાસે સ્કૂલે જવાનો એકમાત્ર વિકલ્પ સાઈકલ હતો. રોજ 36 કિલોમીટર સાઈકલ ચલાવીને જતી આયુષીએ તબિયત ખરાબ હોય તો પણ તેણે ક્યારેય રજા નહોતી પાડી.આયુષીનું સપનું IAS અધિકારી બનવાનું છે. રોજ 36 કિમી સાઈકલ ચલાવતી હોવા છતાં તે દરરોજ 8-10 કલાક વાંચન કરતી હતી. તેનું કહેવું છે કે સારું પરિણામ લાવવા માટે નિયમિત ભણવું ખૂબ જ અનિવાર્ય છે.