9 વર્ષ સુધી નામ વગર રહી છોકરી, કારણની જાણ થતાં તેલંગાણા CMએ કર્યું 'નામકરણ'

હૈદરાબાદ: બાળક જ્યારે માતાના ગર્ભમાં હોય છે ત્યારે માતા-પિતા અને પરિવારના સભ્યો તેના નામ વિશે ચર્ચા કરવા લાગે છે. તેઓ છોકરા-છોકરાનું નામનું લિસ્ટ પણ એડવાન્સમાં બનાવી રાખે છે. પરંતુ તેનાથી વિપરીત તેલંગાણાની એક છોકરી જન્મ પછી 9 વર્ષ સુધી નામ વગર જ રહી. મળતી માહિતી અનુસાર તેનો જન્મ 2013માં થયો હતો. પરંતુ પરિવારે હજી સુધી તેનું નામકરણ કર્યું નહીં. જ્યારે તેલંગાણાના મુખ્યમંત્રીને આ વાતની અને તેના પાછળના કારણની જાણ થઈ ત્યારે તેઓ રવિવારે છોકરી અને તેના પરિવારજનોને મળ્યા હતા.

માતા-પિતાએ અત્યાર સુધી કેમ ના કર્યું બાળકીનું નામકરણ?
છોકરીના માતા-પિતા સુરેશ અને અનિતાએ KCRની આગેવાની હેઠળના તેલંગાણા રાજ્ય આંદોલનમાં સક્રિયપણે ભાગ લીધો હતો. 2013માં જ્યારે દીકરીનો જન્મ થયો ત્યારે તેઓ ઈચ્છતા હતા કે બાળકીનું નામ કેસીઆર દ્વારા રાખવામાં આવે. પરંતુ 9 વર્ષ સુધી તેમની ઈચ્છા પૂરી થઈ ન હતી. જેથી છોકરી અત્યાર સુધી નામ વગર રહી ગઈ.

સ્કૂલ અને આધારકાર્ડમાં છોકરીનું નામ 'ચિટ્ટી' હતું
તેણીનું નામ ન હોવાથી ધોરણ 5 વિદ્યાર્થીનીને શાળામાં ચિટ્ટી તરીકે બોલાવવામાં આવતી હતી. તેના આધાર કાર્ડમાં પણ ચિટ્ટીનું નામ હતું. જો કે, તેના ગામમાં, પડોશીઓ અને પરિચિતો તેણીને KCR તરીકે બોલાવતા કારણ કે તેઓ જાણતા હતા કે તે મુખ્યમંત્રી દ્વારા નામ આપવાની રાહ જોઈ રહી છે.

મુખ્યમંત્રી KCRએ છોકરીનું નામ 'મહતી' રાખ્યું
તેલંગાણા રાષ્ટ્ર સમિતિના વિધાન પરિષદના સભ્ય અને પૂર્વ વિધાનસભા અધ્યક્ષ મધુસુધના ચારીને તાજેતરમાં જ છોકરી વિશે ખબર પડી. ત્યારબાદ તેઓ દંપતી અને બાળકને તેલંગાણાના મુખ્ય પ્રધાનના સત્તાવાર નિવાસસ્થાન પ્રગતિ ભવનમાં લઈ આવ્યા હતા. ત્યારબાદ મુખ્યમંત્રી કેસીઆરે દંપતી, સુરેશ અને અનિતાનું અભિવાદન કર્યું અને નવ વર્ષની બાળકીનું નામ 'મહતી' રાખ્યું હતું.

મહતીના શિક્ષણ માટે આર્થિક સહાયની જાહેરાત
આ ઉપરાંત મુખ્યમંત્રી અને તેમના પત્નીએ દંપતી અને તેમની પુત્રીને ભેટો પણ આપી અને સાથે જ મહતીના શિક્ષણ માટે આર્થિક સહાયની પણ જાહેરાત કરી હતી. જેથી છોકરીના પિતા સુરેશ અને તેમના પરિવારે મુખ્યમંત્રીના હાવભાવથી પ્રભાવિત થઈને તેમનો આભાર વ્યક્ત કર્યો હતો.