ગુડ ન્યુઝઃ ભારતને મળશે કોરોના માટે સૌથી અસરદાર વેક્સીન

નવી દિલ્હીઃ ભારત સરકાર અમેરિકાની જાણીતી બાયોટેક કંપની મોર્ડના સાથે કોવિડ વેક્સીનના ડેવલોપમેન્ટ પર સતત સંપર્કમાં છે. સોમવારે મોર્ડનાએ દાવો કર્યો કે તેની વેક્સીન કોરોના વાયરસના ખાત્મા માટે 94.5 ટકા જેટલી સફળ હી છે. મોર્ડના ઉપરાંત ભારત દ્વારા બીજી કંપનીઓ સાથે પણ વાતચીત ચાલી રહી છે.

મોર્ડનાએ સોમવારે કહ્યું કે કોવિડ-19 વિરુદ્ધ રસી એમ આરએનએ-1273 તેના ત્રીજા તબક્કાના અભ્યાસ માટે નિયુક્ત કરવામાં આવેલ સ્વતંત્ર ડેટા સુરક્ષા નિરિક્ષણ બોર્ડ (DSMB) દ્વારા રસીને 94.5 ટકા જેટલી પ્રભાવશાળી જોવા મળી છે. આ અંગે ભારત સરકારના સૂત્રોએ જણાવ્યું કે અમે ફક્ત મોર્ડના સાથે જ નહીં પરંતુ ફાઇઝર, સીરમ ઇન્સ્ટિટ્યુટ, ભારત બાયોટેક અને ઝાયડસ કેડિલા તમામ રસીના ક્લિનિકલ પરિક્ષણોની પ્રગતિને લઈને સંપર્કમાં છીએ.

જરુરિયાત પડશે તો નિયમોમાં કેટલાક ફેરફાર પણ કરાશે

નવા દવા અને કોસ્મેટિક નિયમો 2019 મુજબ જો કોઈ દવા અથવા રસીનું પરીક્ષણ થઈ ચૂક્યું છે અને તેને ભારત બહાર કંટ્રોલર ઓથોરિટીની મંજૂરી મળી ચૂકી છે તો તેણે ભારતમાં સુરક્ષા નિયામકની મંજૂરી માટે બીજા અને ત્રીજા ચરણના ક્લીનિકલ ટ્રાયલમાંથી પસાર થવું પડશે. જોકે ઇમર્જન્સી અને મહામારી જેવી સ્થિતિમાં જરુરિયાત પડવાથી નિયમોમાં ઢીલ આપી શકાય છે.

બીજી કંપનીઓ પણ પ્રભાવશાળી રસી બનાવવામાં આગળ

કેંબ્રેજ, મેસાચુસેટ્સ સ્થિત મોર્ડનાની જાહેરાતના એક સપ્તાહ પહેલા ફાઇઝર અને બાયોએનટેક પણ પોતાની કોવિડ-19 રસીના પરિક્ષણમાં તેના પરિણામ 90 ટકાથી વધુ સફળ જોવા મળ્યાનું જાહેર કર્યું હતું. મોર્ડનાના મુખ્ય કાર્યકારી અધિકારી સ્ટીફન બાંસેલે કહ્યું કે 'અમારી રસીના વિકાસમાં આ નિર્ણાયક ક્ષણ છે. જાન્યુઆરીમાં અમે એ લક્ષ્ય સાથે વાયરસને સમજવાનો પ્રયાસ કર્યો હતો કે જેનાથી દુનિયાભરના શક્ય તેટલા વધુ લોકોને આ બીમારીથી બચાવી શકાય.'

દેશી વેક્સીન પર ત્રીજા ફેઝમાં

કોરોના વાયરસ મહામારીની દેશી વેક્સીન અંગે પણ સારા સમાચાર મળી રહ્યા છે. ભારત બાયોટેકની કોરોના વેક્સીન કોવાક્સિન પોતાના ટ્રાયલના ફાઇનલ સ્ટેજમાં છે. આ વેક્સીનના બે ચરણના ટ્રાયલ ખૂબ જ સફળ અને આશાસ્પદ રહ્યા છે. હાલ તેનું ત્રીજા તબક્કાનું પરીક્ષણ શરું છે.