ટૉપ 10 અપરાધીઓમાં મોદી, ગૂગલને નોટિસ

ઈલાહાબાદ: ગૂગલ સર્ચમાં નરેન્દ્ર મોદીનું નામ ટૉપ 10 અપરાધીઓની યાદીમાં હોવાના મામલામાં એક નવો વળાંક આવ્યો છે. ઈલાહાબાદની એક અદાલતમાં મંગળવારે ગૂગલ કંપનીના સીઈઓ અને ઈન્ડિયા હેડ ને નોટિસ મોકલવામાં આવી છે.

કોર્ટે ગૂગલ અને તેના ઉચ્ચઅધિકારીઓ વિરુધ્ધ કેસ દાખલ કરવાનો આદેશ આપ્યો છે. એડવોકેટ સુશિલ કુમાર મિશ્રાની ફરિયાદ પર સુનાવણી કરતાં કોર્ટે આ આદેશ આપ્યો છે. આ કેસની આગામી સુનાવણી 31 ઑગષ્ટના રોજ થશે.

તમને જણાવી દઈએ કે આ વાત સામે આવ્યા બાદ સોશિયલ મીડિયા અને ખાસ કરીને ટ્વિટર પર જંગ છેડાઈ ગઈ હતી. ફરીયાદીએ જણાવ્યું કે ગૂગલને અપરાધીઓની યાદીમાંથી મોદીનું નામ ખસાવવા માટે કહેવામાં આવ્યું, પણ કોઈ જવાબ ના મળ્યો. ત્યારબાદ તેમણે પોલીસની મદદ લીધી. ફરીયાદીએ ચીફ જ્યુડિશલ મેજિસ્ટ્રેટ સામે એક અરજી દાખલ કરી, પરંતુ 3 નવેમ્બર, 2015ના રોજ તે રદ થઈ ગઈ. ત્યારબાદ સીજીએમના આદેશને રિવિઝન એપ્લિકેશન તરીકે ફરી રજુ કરી, અને કોર્ટે આ આદેશ આપ્યો.

ધ્યાનમાં લેવા જેવી વાત છે કે ગૂગલે આ મુદ્દે માફી પણ માંગી હતી. ગૂગલ પહેલાં પણ કહી ચુક્યું છે કે આવા વિવાદાસ્પદ સર્ચ રિઝલ્ટ સાથે તેમની વિચારધારાને કોઈ લેવા-દેવા હોતી નથી.