છોકરીઓની લગ્નની ઉંમરમાં થશે ફેરફાર? પીએમ મોદીએ કર્યો ઈશારો

નવી દિલ્હી: ભારત સરકાર છોકરીઓની લગ્ન માટેની ઉંમર પર પુન:વિચાર કરવા જઈ રહી છે. પ્રાપ્ત વિગતો અનુસાર, છોકરીઓની લગ્નની ઉંમર 18 વર્ષથી વધારીને 21 વર્ષ કરવામાં આવી શકે છે. આ નિર્ણયથી મહિલાઓના જીવનમાં મોટું પરિવર્તન આવે તેવી શક્યતા છે. પીએમ મોદીએ સ્વતંત્રતા દિન પર જણાવ્યું હતું કે દીકરીઓની લગ્ન માટેની ઓછામાં ઓછી ઉંમર પર પુનર્વિચાર કરવા માટે એક સમિતિનું ગઠન કરવામાં આવ્યું છે. સમિતિ પોતાનો રિપોર્ટ રજૂ કરે ત્યારબાદ સરકાર આ અંગે યોગ્ય નિર્ણય લેશે.

માતૃ મૃત્યુદરમાં થશે ઘટાડો

લગ્નની લઘુત્તમ વયમર્યાદામાં ઘટાડો કરવાનો એક ઉદ્દેશ મેટરનલ મોર્ટાલિટીમાં કમી લાવવાનો પણ છે. એવું મનાઈ રહ્યું છે કે આ કવાયત પાછળ સુપ્રીમ કોર્ટનો એક ચુકાદો પણ હોઈ શકે છે.

નાણાંમંત્રીએ પણ કર્યો હતો ઉલ્લેખ

નાણાંમંત્રી નિર્મલા સિતારમણે પણ પોતાના પાછલા બજેટમાં કહ્યું હતું કે મહિલાની માતા બનવાની સાચી ઉંમર વિશે સલાહ આપવા માટે ટાસ્ક ફોર્સ બનાવાઈ છે. સિતારમણ બાદ હવે પીએમ મોદીએ પણ ટાસ્ક ફોર્સના રિપોર્ટ બાદ મહિલાઓની લગ્ન માટેની લઘુત્તમ વયમર્યાદા પર ફરી વિચાર કરવાની વાત કરી છે.

સુપ્રીમે સરકાર પર ફેસલો છોડેલો

જાણકારોનું માનીએ તો સુપ્રીમ કોર્ટે 2017માં એક ચુકાદો આપ્યો હતો. જેમાં કોર્ટે જણાવ્યું હતું કે વૈવાહિક બળાત્કારથી છોકરીઓને બચાવવા માટે બાળ વિવાહ સંપૂર્ણપણે ગેરકાયદે માનવામાં આવે. કોર્ટે લગ્નની લઘુત્તમ ઉંમર નક્કી કરવાનું કામ સરકાર પર છોડી દીધું હતું. એક્સપર્ટ્સનું માનીએ તો સરકાર કોર્ટના આ જજમેન્ટ બાદ આ મામલે વિચાર કરી રહી છે.

એક સરકારી સૂત્રનું માનીએ તો લગ્ન માટે યુવક અને યુવતીની લઘુત્તમ ઉંમર એક સરખી હોવી જોઈએ. જો મા બનવાની કાયદાકીય ઉંમર 21 વર્ષ કરી દેવાય તો મહિલાની પ્રજોત્પતિના વર્ષોમાં પણ ઘટાડો આવશે.