હાથરસ કેસ પીડિતા અને મુખ્ય આરોપી એક બીજાના સંપર્કમાં હતા, 104 વખત થયા કોલ

હાથરસઃ ઉત્તર પ્રદેશના હાથરસ ગેંગરેપ કેસમાં નવો વળાંક સામે આવ્યો છે. યુપી પોલીસની તપાસમાં સામે આવ્યું છે કે 19 વર્ષીય પીડિતા આ કેસના મુખ્ય આરોપી સાથે સતત સંપર્કમાં હતી. સપ્ટેમ્બરમાં દલિત યુવતી ઉપર કથિત સામૂહિક બળાત્કાર અને ખૂની હુમલો કરવાના કેસમાં આ જ ગામનો સંદીપ સિંહ મુખ્ય આરોપી છે. ઉત્તર પ્રદેશ પોલીસે પીડિત પરિવાર અને મુખ્ય આરોપીના ફોનની તપાસ કરી છે. તેમાં જાણવા મળ્યું કે પીડિતા મુખ્ય આરોપી સાથે સતત ટેલિફોન સંપર્કમાં હતી.

પોલીસના જણાવ્યા અનુસાર તપાસમાં બહાર આવ્યું છે કે સંદીપને પીડિતના ભાઈના નામ પરના નંબરથી નિયમિત કોલ આવતા હતા. 13 ઓક્ટોબર, 2019 ના રોજ પીડિતાના ભાઈના નંબર 989xxxxx અને સંદીપની 76186xxxxx વચ્ચે એક ટેલિફોનિક વાતચીત શરૂ થઈ. મોટાભાગના કોલ ચંદપા વિસ્તારમાં સ્થિત સેલ ટાવર્સથી કરવામાં આવ્યા હતા, જે ભોગ બનનારના ગામ, માત્ર 2 કિ.મી. દૂર છે.

પીડિતા અને મુખ્ય આરોપી વચ્ચે 104 વખત વાત
પોલીસના જણાવ્યા મુજબ, કોલ રેકોર્ડ બતાવે છે કે બંને ફોન નંબર વચ્ચે 62 આઉટગોઇંગ અને 42 ઇનકમિંગ કોલ્સ સહિત કુલ 104 કોલ્સ હતા. પોલીસના જણાવ્યા મુજબ, કોલ રેકોર્ડ બતાવે છે કે પીડિતા અને મુખ્ય આરોપી સતત સંપર્કમાં હતા.

શું છે સમગ્ર ઘટના
હાથરસની ઘટના 14 સપ્ટેમ્બરના રોજ બની હતી, જ્યારે પીડિતા ખેતરમાં કામ કરતી હતી. ત્યારે આરોપી તેને નજીકના ખેતરમાં ખેંચી ગયા હતા અને માર માર્યો હતો. પરિવારે આરોપ લગાવ્યો છે કે તેની સાથે ગેંગરેપ કરવામાં આવ્યો હતો અને તેનું ગળું દબાવવામાં આવ્યું હતું. આને કારણે તેને ગળાના હાડકા અને કરોડરજ્જુને ગંભીર ઇજાઓ થતાં અલીગઢની એક હોસ્પિટલમાં દાખલ કરવામાં આવી હતી. બાદમાં તેને દિલ્હીની હોસ્પિટલમાં રિફર કરાઈ હતી, જ્યાં તેનું 29 સપ્ટેમ્બરના રોજ અવસાન થયું હતું.