હાથરસ પીડિતાના ભાઈએ કહ્યું- બહેનના લગ્ન થવાના હતા અને લોકડાઉન નડી ગયું

મુંબઈઃ ઉત્તરપ્રદેશના હાથરસમાં જે ઘટના બની તેનાથી દેશના લોકો વ્યથિત છે, આ મુદ્દા પર રાજકારણ પણ ગરમાઈ રહ્યું છે ત્યારે હાથરસ પીડિતાના લગ્ન થવાના હતા, પરંતુ કોરોના વાયરસના કારણે જાહેર કરાયેલા લોકડાઉનના કારણે તે રોકાઈ ગયા હતા. જો લગ્ન થઈ ગયા હોત તો આ ઘટના ના બની હોત. પીડિતાના પિતરાઈ ભાઈએ આ વાત કરી છે. તેમનો પિતરાઈ ભાઈ મુંબઈના ઉલ્હાસનગરમાં રહે છે અને ડ્રાઈવર તરીકે કામ કરે છે.

પિતરાઈ ભાઈ ઉલ્હાસનગરના ધોબીઘાટ વિસ્તારમાં રહે છે. તેમણે જણાવ્યું કે પીડિતાની ત્રણ બહેનો હતી. જેમાંથી એકના લગ્ન થઈ ગયા છે. બીજી અવિવાહિત છે. પીડિતા સૌથી નાની બહેન હતી. જેની સગાઈ પણ થઈ ગઈ હતી. કોરોનાના કારણે તેના લગ્ન અટકાવવા પડ્યા હતા. જો તેના લગ્ન થઈ ગયા હોત તો આજે તેણે કે તેના પરિવારે આ દિવસ જોવાનો વારો ના આવ્યો હોત.

ટીવી પર જોઈ હતી ખબર

પીડિતાના પિતરાઈ ભાઈ જણાવે છે કે તેમની બહેન ખેતરમાં કામ કરતી હતી. માતા-પિતાને મદદ કરતી હતી. ઘટના વિશે તેમને 6 દિવસ પછી ટીવી પર સમાચાર જોયા પછી ખબર પડી. બહેન વધારે ભણેલી નહોતી. ભાઈએ જણાવ્યું કે આ પહેલા પણ તેમની પર બળાત્કારની કોશિશ કરવામાં આવી હતી.

જાતિવાદનું પ્રમાણ ઘણું વધુ

તેઓ જણાવે છે કે ગામમાં વાલ્મીકિ સમાજના માત્ર ત્રણ ઘર છે. ગામમાં જાતિવાદ ઘણો છે. જાતિવાદના કારણે જ બહેનનો જીવ ગયો છે. તેઓ જણાવે છે કે તેમની બહેન પર બળાત્કાર ગુજારવામાં આવ્યો અને તેમને બહુ જ ખરાબ રીતે માર મારવામાં આવ્યો. પહેલી વખત જ્યારે બળાત્કારની કોશિશ કરવામાં આવી હતી, ત્યારે કાકીનો અવાજ સાંભળીને આરોપીઓ ભાગી ગયા હતા. તેઓ પોતે પણ હાથરસ જવા માગે છે પરંતુ ટિકિટ ના મળાના કારણે તેઓ ત્યાં જઈ શકે તેમ નથી.

કેસ CBIને સોંપવામાં આવ્યો

હાથરસમાં દલિત યુવતી સાથે બનેલી ગેંગરેપ ઘટનામાં પોલીસની ભૂમિકા શંકાના ઘેરામાં આવી ગઈ છે અને જે બાદ ટીકાઓથી ઘેરાયેલી યોગી સરકારે કેસની CBIને તપાસની ભલામણ કરી છે. મુખ્યમંત્રી યોગી આદિત્યનાથે શનિવારે ટ્વિટ કરીને આ જાહેરાત કરી હતી. આ પહેલા ભારે વિવાદ વચ્ચે કોંગ્રેસના નેતા રાહુલ ગાંધી અને પ્રિયંકા ગાંધી વાડ્રાએ હાથરસ જઈને પીડિતાના પરિવારની મુલાકાત લીધી હતી.