ભાવિકા જૈન/સુમિત્રા દેવ રોય, મુંબઈ: લોકડાઉનને કારણે ગરીબ વર્ગની હાલત એટલી દયનીય બની ગઈ છે કે જેની કદાચ કોઈ સામાન્ય વ્યક્તિ કલ્પના પણ ના કરી શકે. એક તરફ બેરોજગાર થઈ ગયેલા મજૂરો દિવસો સુધી ચાલી પોતાના વતન પહોંચી રહ્યા છે, તો શહેરોમાં જ રહેતા ગરીબોની હાલત પણ સારી નથી. આ તસવીર મુંબઈની છે, જેમાં એક ગરીબ બાપને પોતાની દીકરીને ખભે ઉંચકીને 26 કિમી ચાલી દવાખાને લઈ જવી પડી હતી.હવે ટેલિગ્રામ પર મેળવો દરેક મહત્વના સમાચાર, અમારી ચેનલ સબસ્ક્રાઈબ કરવા ક્લિક કરોપોતાની દીકરીને ખભે ઉંચકીને ચાલી રહેલા મોહમ્મદ રફી નામના 60 વર્ષના આ શખ્સ મુંબઈના એક સ્લમ એરિયામાં રહે છે. કૂક તરીકે કામ કરતાં મોહમ્મદ રફી લોકડાઉનમાં બેરોજગાર બની ગયા છે. તેમની 17 વર્ષની દીકરીને પેટમાં કોઈ રોગ થતાં તેની તબિયત અચાનક લથડી હતી. પરંતુ આ ગરીબ બાપ પાસે ટેક્સી કરીને હોસ્પિટલે જવાના પણ પૈસા નહોતા.આખરે 60 વર્ષની ઉંમરે પણ આ લાચાર બાપ પોતાની 17 વર્ષની છોકરીને ખભે ઉંચકીને 26 કિલોમીટર ચાલી પોતાના ગોવંડી વિસ્તારમાં આવેલા ઘરેથી મુંબઈના પારલે વિસ્તારમાં આવેલી કેઈએમ હોસ્પિટલ લઈ ગયો હતો, અને દવા લઈને પરત આવ્યો હતો. આ લાચારી તો હાલ મુંબઈમાં મોહમ્મદ રફી જેવા અનેક ગરીબો ભોગવી રહ્યા છે, જેમની હાલત લોકડાઉનને કારણે અત્યંત કફોડી બની ગઈ છે.લોકડાઉનને આજે એક મહિનો પૂરો થયો છે. 24 માર્ચે મુંબઈમાં માત્ર 41 કેસો હતા, જે 23 એપ્રિલે 100 ગણા વધીને 4205 થઈ ગયા હતા. મહારાષ્ટ્રમાં કોરોનાથી 280 લોકોએ પોતાના જીવ પણ ગુમાવ્યા છે. હવે તો આ વાયરસ મુંબઈની ઝૂંપડપટ્ટીઓમાં પણ ફેલાઈ ચૂક્યો છે, ત્યારે તેના પર ક્યારે કાબૂ આવશે તે કહેવું મુશ્કેલ છે.