હોસ્પિટલે નવજાત બાળકીને મૃત જાહેર કરી, ઘરે લઈ જતા થઈ જીવતી! પછી ચોંકવનારી ઘટના ઘટી

દિલ્હીઃ હોસ્પિટલમાં નવજાત શિશુના સ્વાસ્થ્યને લઈને ઘણા કિસ્સાઓ બનતા હોય છે. પરંતુ દિલ્હી હોસ્પિટલમાં એક ચોંકાવનારો કિસ્સો સામે આવ્યો છે. લોક નાયક હોસ્પિટલમાં મહિલાની પ્રિમેચ્યોર ડિલિવરી થઈ હતી. મીડિયા અહેવાલો પ્રમાણે દિલ્હીની લોક નાયક હોસ્પિટલમાં ડિલિવરી દરમિયાન બાળકી મૃત અવસ્થામાં જન્મી હોવાની માહિતી મળી હતી. જોકે ત્યારપછી જ્યારે નવજાત બાળકીને અંતિમ ક્રિયા માટે ઘરે મોકલવામાં આવી ત્યારે તેના હાથ પગમાં હજુ જીવ હોવાની માહિતી સામે આવી હતી. ત્યારપછી પરિવાર તાત્કાલિક હોસ્પિટલ દોડ્યા અને જોતજોતામાં ગણતરીના કલાકોની અંદર બાળકીએ અંતિમ શ્વાસ લેતા ચકચાર મચી ગઈ છે. જાણો સંપૂર્ણ ઘટનાક્રમ...

પરિવારે જોયું તો બાળકી જીવતી હતી

3 દિવસની નવજાત બાળકીને દિલ્હીની લોકનાયક હોસ્પિટલમાં મૃત જાહેર કરી દેવામાં આવી હતી. જોકે પરિવારે તેના અંતિમ ક્રિયાની તૈયારીઓ પણ કરી લીધી હતી. જ્યારે બાળકીને ઘરે લાવવામાં આવી તો પરિવારના પગ નીચેથી જમીન ખસી ગઈ હતી. તેમણે ચેક કર્યું તો બાળકીમાં હજુ પ્રાણ હતા. તેના પગ અને હાથ જીવંત હતા. આ જોતાની સાથે જ પરિવારે તાત્કાલિક તેને હોસ્પિટલમાં સારવાર માટે ખસેડી દીધી હતી.

વેન્ટિલેટર સપોર્ટ પર બાળકી રહી

મીડિયા અહેવાલો પ્રમાણે બાળકીને વેન્ટિલેટર સપોર્ટ પર રાખવામાં આવી હતી. જોકે આ નવજાત બાળકી 23 સપ્તાહ પ્રિમેચ્યોર હતી. પરિવારજનોએ પુષ્ટી કરી કે વેન્ટિલેટર પર બાળકીને રાખવામાં આવી હતી. જોકે ત્યારપછી 4 વાગ્યે તેનું નિધન થયું હતું. જોકે પરિવારજનોએ કહ્યું કે 11 વાગ્યા સુધી પરિવારજનોને બાળકીનો પાર્થિવ દેહ આપવામાં નહોતો આવ્યો.

હોસ્પિટલને પોસ્ટમોર્ટમ કરવાની અનુમતિ જોઈતી હતી

મીડિયા અહેવાલો પ્રમાણે હોસ્પિટલને નવજાત બાળકીનું પોસ્ટમોર્ટમ કરવાની અનુમતિ જોઈતી હતી. જોકે પરિવારજનોએ તેની સ્પષ્ટપણે ના પાડી દીધી હતી. તેમણે જણાવ્યું કે અમે નથી ઈચ્છતા કે બાળકી હજુ વધારે કષ્ટ અનુભવે. એને શાંતિપૂર્વક અંતિમ વિદાય આપવા માગીએ છીએ.

નવજાત બાળકીના કાકાએ ઘટનાક્રમ વર્ણવ્યો

રવિવારે સાંજે મહિલાને પેટમાં દુખાવો થયો હતો. જેથી કરીને તેને સારવાર અર્થે ખસેડવામાં આવી હતી. જ્યાં મહિલાની પ્રિમેચ્યોર ડિલિવરી કરાઈ હતી. આ દરમિયાન તેણે બાળકીને જન્મ આપ્યો હતો. જોકે ત્યારપછી હોસ્પિટલના અધિકારીઓએ આ નવજાત બાળકીને મૃત જાહેર કરી દીધી હતી. તથા એક બોક્સમાં તેના દેહને રાખી પરિવારને સોંપી દીધો હતો. મીડિયા અહેવાલો પ્રમાણે અંતિમ ક્રિયા સમયે જ્યારે પરિવારે બોક્સ ખોલ્યુ તો અંદર બાળકીના હાથ અને પગમાં જીવ હોવાનું જાણવા મળ્યું હતું.

પરિવારજનો ચોંકી ગયા

જોકે બાળકીના હાથ પગમાં જીવ હોવાથી તેઓ તાત્કાલિક હોસ્પિટલ દોડી ગયા હતા. જ્યાં બાળકીને વેન્ટિલેટર પર રાખવામાં આવી હતી. પરિવારજનો દાવો કરી રહ્યા છે કે જ્યારે બાળકી જીવતી હોવાનું તેમણે ડોકટરને કહ્યું તો તેમણે કોઈપણ પ્રકારનું નિવેદન આપ્યું નહોતું. આની સાથે તાત્કાલિક સારવાર શરૂ કરીને બાળકીને ઓબ્ઝર્વેશનમાં મુકી દેવામાં આવી હતી. નોંધનીય છે કે હવે અહેવાલો પ્રમાણે બાળકીએ જીવન અને મરણ વચ્ચેનો જંગ ગુમાવી દીધો છે. તેનું કરૂણ નિધન થતા ચકચાર મચી ગઈ છે.