સિક્કો ગળી ગયો બાળક, કન્ટેન્ટમેન્ટ ઝોનમાં ઘર હોવાના કારણે હોસ્પિટલે દાખલ ન કર્યો અને...

કેરળઃ કોચ્ચિમાં એક 3 વર્ષના બાળકના ગળામાં સિક્કો ફસાયા પછી દમ ઘૂટવાથી મોત થયું હતું. પરિવારના લોકોનો આરોપ છે કે બાળકે ભૂલથી એક સિક્કો મોઢામાં નાખી દીધો હતો. જે તેના ગળામાં ફસાય ગયો હતો. જેની જાણકારી પછી પરિવાર તેને લઈને હોસ્પિટલ પહોંચ્યો, જોકે, તેનું ઘર કન્ટેન્ટમેન્ટ ઝોનમાં હતું એટલે કોઈ સરકારી હોસ્પિટલે તેની સારવાર ન કરી. આ દરમિયાન દમ ઘૂટવાના કારણે બાળકનું મોત થઈ ગયું હતું. કેરળની સ્વાસ્થ્ય મંત્રી કેકે શૈલજાએ આ ઘટનાને દુર્ભાગ્યપૂર્ણ જણાવતા સ્વાસ્થ્ય સચિવ પાસેથી રિપોર્ટ માગી છે.

હોસ્પિટલે દાખલ કરવાની પાડી ના
કોચ્ચિના કંદુનગુલ્લૂર વિસ્તારમાં રહેતા આ પરિવારનું કહેવું છે કે, શનિવારે સવારે બાળકની તબીયત બગડી હતી. જેથી તેઓ તેને લઈને અલૂવા ગવર્મેન્ટ હોસ્પિટલ પહોંચ્યા હતાં. આ દરમિયાન જ્યારે બાળકનો એક્સરે કરવામાં આવ્યો તો સિક્કો ફસાયેલો છે તેવું જાણવા મળ્યું હતું. જોકે, પછી પણ હોસ્પિટલે બાળકને દાખલ કરવાની મનાઈ કરી હતી. પરિવારે કહ્યું કે, તેઓ કન્ટેન્ટમેન્ટ ઝોનમાં રહે છે. જેથી ડોક્ટર્સે બાળકને એડમિટ ન કર્યો.

ડોક્ટર્સની લાપરવાહી પર આદેશ
જોકે, ડોક્ટર્સનું કહેવું છે કે, હોસ્પિટલમાં બાળકોનો કોઈ ડોક્ટર નહોતો, જેથી તેમણે અન્ય હોસ્પિટલમાં લઈ જવાનું કહ્યું હતું. જે પછી પરિવાર બાળકને એર્નાકુલમના સરકારી હોસ્પિટલ લઈને પહોંચ્યો હતો. અહીં પણ કોઈ ડોક્ટરે તેને દાખલ કર્યો નહોતો. જ્યાંથી બાળકને અલપુઝાના હોસ્પિટલ લઈ જવામાં આવ્યો. જ્યાં પણ તેને દાખલ કરવાની ના પાડી હતી. જે પછી આ બાળકનું મોત થયું હતું. આ ઘટનાની જાણકારી પછી કેરળના સ્વાસ્થ્ય મંત્રીએ ડોક્ટર્સ પર કથિત લાપરવાહીના તપાસના આદેશ આપ્યા છે.