'હમ દો હમારે દો', મોટેરા સ્ટેડિયમને નરેન્દ્ર મોદીનું નામ આપ્યા બાદ રાહુલ ગાંધીનો કટાક્ષ

નવી દિલ્હીઃ અમદાવાદના મોટેરા સ્ટેડિયમનું નામ બદલીને નરેન્દ્ર મોદી સ્ટેડિયમ કરી દેવામાં આવ્યું છે જેને લઈને કોંગ્રેસી નેતા રાહુલ ગાંધીએ કટાક્ષ કર્યો છે. તેમણે ફરીથી 'હમ દો હમારે દો'ની વાતનું પુનરાવર્તન કરતા કહ્યું છે કે સ્ટેડિયમનું નામ વડાપ્રધાનના નામ પરથી તથા બે એન્ડ્સનું નામ કોર્પોરેટ કંપનીઓના નામ પરથી રાખવાથી સત્ય બહાર આવી ગયું છે.

રાહુલ ગાંધીએ 'HumDoHumareDo' હેશટેગ સાથે લખ્યું છે કે, સુંદર, કેવી રીતે સત્ય બહાર આવી ગયું. નરેન્દ્ર મોદી સ્ટેડિયમ- અદાણી એન્ડ અને રિલાયન્સ એન્ડ. જય શાહ ક્રિકેટ એડમિનિસ્ટ્રેશનમાં છે.

અમદાવાદમાં આવેલા સ્ટેડિયમને વડાપ્રધાન નરેન્દ્ર મોદીનું નામ આપ્યા બાદ વિવાદ ઊભો થયો હતો. ત્યારબાદ સરકારે જણાવ્યું હતું કે ફક્ત સ્ટેડિયમનું જ નામ બદલવામાં આવ્યું છે અને સમગ્ર સ્પોર્ટ્સ કોમ્પલેક્સ સરદાર પટેલના નામથી જ ઓળખાશે.

ભારત અને ઈંગ્લેન્ડ વિરુદ્ધ બુધવારે ત્રીજી ટેસ્ટ મેચ અગાઉ રાષ્ટ્રપતિ રામનાથ કોવિંદે અમદાવાદમાં વિશ્વના સૌથી મોટા ક્રિકેટ સ્ટેડિયમનું ઉદ્દઘાટન કર્યું હતું. જે હવે નરેન્દ્ર મોદી સ્ટેડિયમ તરીકે ઓળખાશે. ત્યારબાદ સોશિયલ મીડિયા પર કોંગ્રેસ સહિત વિરોધ પક્ષના નેતાઓ દ્વારા તેની ટીકા કરવામાં આવી હતી અને તેને સરદાર પટેલનું અપમાન ગણાવ્યું હતું.