કાશ્મીર અંગે ઈસ્લામિક દેશોના OICએ આ પગલું ભર્યું તો ભારતે આપી કડક ચેતાવણી, દખલગીરી કરવાની બિલકુલ જરૂર નથી

ઈસ્લામિક દેશના સંગઠન OICના મહાસચિવ હિસાન બ્રાહિમ તાહા તરફથી કાશ્મીર અંગે એક વિવાદાસ્પદ નિવેદન આપતા ભારતે આકરી પ્રતિક્રિયા આપી છે. ભારતે આ સંગઠનની ટીકા કરતા કહ્યું છે કે ભારતની આંતરિક બાબતોમાં અમે કોઈની પણ કોઈ જ પ્રકારની દરમિયાનગીરી ઈચ્છતા નથી.

POKના ત્રણ દિવસના પ્રવાસ પર ગયેલા મહાસચિવ તાહાએ કહ્યું હતું કે કાશ્મીર વિવાદને ઉકેલવા માટે IOC વાતચીતનો એક મુસદ્દો તૈયાર કરી રહ્યું છે. હિસાન બ્રાહિમ તાહાએ કહ્યું હતું કે કાશ્મીર મુદ્દાનો ઉકેલ જરૂરી છે. વાતચીત મારફતે તેનો ઉકેલ મેળવી શકાય તેમ છે. પાકિસ્તાન સરકાર અને અન્ય દેશો સાથે મળીના એક યોજના તૈયાર કરવામાં આવી રહી છે.

જમ્મુ-કાશ્મીર ભારતનો અવિભાજ્ય ભાગ
વિદેશ મંત્રાલયના પ્રવક્તા અરિંદમ બાગચીએ મંગળવારે OICને આડે હાથ લેતા કહ્યું કે અમે OIC મહાસચિવ બ્રાહિમ તાહા તરફથી જમ્મુ-કાશ્મીર અંગે જે ટિપ્પણી કરવામાં આવી છે તેની આકરી ટીકા કરી છીએ. તેમણે આ સંગઠનને સ્પષ્ટ શબ્દોમાં કહ્યું જમ્મુ-કાશ્મીર ભારતનો અભિન્ન અને અવિભાજ્ય હિસ્સો છે અને તેમા કોઈ અન્ય દેશની દરમિયાનગીરી અમને સ્વીકાર્ય નથી.

OIC વિશ્વસનીયતા ગુમાવી ચુક્યું છેઃ ભારત સરકાર
ભારતીય વિદેશ મંત્રાલયના પ્રવક્તા અરિંદમ બાગચીએ મીડિયા સમક્ષ જણાવ્યું કે ઈસ્લામિક દેશોનું સંગઠન (OIC) સંપૂર્ણ સાંપ્રદાયિક, પક્ષપાતી અને તથ્યાત્મક રીતે ખોટું સ્ટેન્ડ લઈ પોતાની વિશ્વસનીયતાને ગુમાવી ચુક્યું છે. આ એક કમનસીબ બાબત છે કે તેના મહાસચિવ પણ પાકિસ્તાનનું મહોરું બની ગયા છે.

બાગચીએ કહ્યું કે અમને આશા છે કે ભારતમાં ખાસ કરીને જમ્મુ-કાશ્મીરની માફક પાકિસ્તાન તરફથી જે ક્રોસ-બોર્ડર આતંકવાદને ઉત્તેજન આપવામાં આવી રહ્યું છે કે તેમાં પાકિસ્તાનના નાપાક એજન્ડાને આગળ વધારવાથી આ સંગઠન દૂર રહેશે.

કોણ છે OIC
OIC એ 57 મુસ્લિમ દેશોનું સંગઠન છે. તેનું પૂરું નામ ઈસ્લામિક ઓર્ગેનાઈઝેશન ઓફ કોઓપરેશન છે. એવું માનવામાં આવે છે કે આ સંગઠનમાં સાઉદી અરેબિયા અને સહયોગી દેશોનું પ્રભૂત્વ છે. OICનું વડુમથક પણ સાઉદી અરેબિયાના જેદ્દા શહેરમાં છે. આ સંગઠનની પૂર્વશરત એ છે કે તેમાં ફક્ત ઈસ્લામિક દેશો જ સામેલ થઈ શકે છે. આંતરરાષ્ટ્રીય શાંતિ અને મુસલમાનોની સુરક્ષા કરવાનો તેનો મુખ્ય ઉદ્દેશ છે.