પૂનાની એક રેસ્ટોરન્ટ લાવી ખાસ ઓફર, 60 મિનિટમાં થાળી ખતમ કરો અને જીતો બુલેટ

કોરોના વાયરસની આ મહામારીના કારણે સૌથી વધારે નુકસાન રેસ્ટોરન્ટ્સના બિઝનેસને થયું છે. ત્યારે મહારાષ્ટ્રના પૂનાની એક રેસ્ટોરન્ટે વધુને વધુ ગ્રાહકોને આકર્ષવા માટે એક ખાસ ઓફર મૂકી છે. શિવરાજ નામની આ હોટલે તેમના ત્યાં વધુને વધુ ગ્રાહકોને આકર્ષિત કરવા માટે 'વિન ધ બુલેટ બાઈક' નામની ઓફર શરૂ કરી છે. જેમાં આ રેસ્ટોરન્ટમાં જમવા આવનાર વ્યક્તિ રોયલ એનફીલ્ડ બુલેટ બાઈક જીતી શકે છે. અને તે પણ માત્ર 60 મિનિટ એટલે કે 1 કલાકના સમયગાળામાં.

મળતી માહિતી મુજબ, પૂનાની આ રેસ્ટોરન્ટમાં આવનાર ગ્રાહક જો રોયલ એનફીલ્ડ બુલેટ જીતવા માગે છે તો તેણે માત્ર 60 મિનિટ એટલે કે 1 કલાકમાં આ થાળી ખતમ કરવાની રહેશે. આ નોન-વેજ થાળી છે. પૂનાની આ શિવરાજ હોટેલના માલિક અતુલ વાયકર જણાવે છે કે વધુને વધુ ગ્રાહકો અમારી રેસ્ટોરન્ટમાં જમવા માટે આવે તે માટે આ ઓફર શરૂ કરવા માટે વિચાર્યું હતું.

તેમણે પોતાની આ રેસ્ટોરન્ટમાં એકદમ નવા 5 રોયલ એનફીલ્ડ બુલેટ લાવીને મૂક્યા છે. આ થાળીનું નામ પણ 'ધ બુલેટ થાળી' છે. આ એક નોન-વેજ થાળી છે કે જેમાં 4 કિલો મટન અને તળેલી માછલી સહિત લગભગ 12 પ્રકારની વાનગીઓ હોય છે.

તેમણે જણાવ્યું કે અમે રેસ્ટોરન્ટમાં કોરોનાની ગાઈડલાઈનનું પાલન કરતા સોશિયલ ડિસ્ટન્સનું પાલન કરીએ છીએ. અહીં રોજની લગભગ 65 થાળીઓ વેચવામાં આવે છે. આ હોટેલની પ્રખ્યાત થાળીઓમાં રાવણ થાળી, બુલેટ થાળી, પહેલવાન મટન થાળી, બકાસુર ચીકન થાળી અને સ્પેશિયલ મટન થાળી સામેલ છે.