IIMમાંથી અભ્યાસ કરનાર આ યુવતીએ છોડી અમેરિકાની નોકરી, શરૂ કર્યો આ વ્યવસાય

અજમેર: દેશની પ્રતિષ્ઠિત સંસ્થા IIM કોલકાતામાંથી માર્કેટિંગના વિષયમાં MBAનો અભ્યાસ કરનાર અંકિતા કુમાવત નામની આ યુવતીને અમેરિકામાં નોકરી મળી હતી. અમેરિકામાં થોડા વર્ષ નોકરી કર્યા બાદ આ યુવતીએ રાજસ્થાન પરત ફરીને પોતાનો વ્યવસાય કરવાનું નક્કી કર્યું. હવે અંકિતા નામની આ યુવતીએ ઓર્ગેનિક દૂધનું ઉત્પાદન શરૂ કરીને પોતાનો ડેરી ફાર્મનો વ્યવસાય શરૂ કર્યો છે.

IIM કોલકાતામાંથી MBAનો અભ્યાસ કરનાર 33 વર્ષીય અંકિતાએ અમેરિકાની નોકરી છોડ્યા પછી રાજસ્થાનના નાનકડા ગામ બદલિયામાં પોતાનો વ્યવસાય શરૂ કર્યો. હાલ આ વ્યવસાય હેઠળ ઓર્ગેનિક દૂધ અને કરિયાણાનું ઉત્પાદન કરીને તે પ્રોડક્ટનું સમગ્ર વિશ્વમાં ઓનલાઈન વેચાણ કરે છે. અંકિતા કુમાવતનો પતિ ઓર્ગેનિક શાકભાજીનું ઉત્પાદન કરી રહ્યો છે, જે હેઠળ આશરે 100 લોકોને રોજગારી મળી રહી છે. MBAનો અભ્યાસ કરનાર આ કપલનો મુખ્ય હેતુ મધ્યમ વર્ગના પરિવારોને ઓર્ગેનિક ફૂડ પૂરું પાડવાનો છે.

લોકડાઉન દરમિયાન અંકિતાએ તેના ગામના લોકોને રોજગારી પૂરી પાડી અને ઓર્ગેનિક દૂધની પ્રોડક્ટ્સ તેમજ શાકભાજીનું વેચાણ કર્યું હતું. આ યુવતીને તે વાતનો ગર્વ છે કે તે પોતાના ગામ માટે કામ કરી રહી છે. આ કપલ રાજસ્થાનના આ નાનકડા ગામના ફાર્મહાઉસમાં રહે છે અને તેમની પાસે કુલ 50 ગાય છે.

અંકિતાએ જણાવ્યું કે મેં વર્ષ 2014માં નોકરી છોડી અને ખેતીનો વ્યવસાય શરૂ કર્યો. આ પહેલા વ્યવસાય સંબંધિત ખાસ્સું સંશોધન પણ કર્યું હતું. અમે 150 કરતા વધારે ઓર્ગેનિક પ્રોડક્ટ્સનું ઓનલાઈન વેચાણ કરીએ છીએ. સાથે જ સ્થાનિક લોકોને પણ ઓર્ગેનિક પ્રોડક્ટ્સ પહોંચાડીએ છીએ. અમે ખેડૂતોને એ વાતનું પ્રોત્સાહન આપવા માગીએ છીએ કે ઓર્ગેનિક ખેતી સારો વિકલ્પ છે.