LoC પર પહેલીવાર મહિલા સૈનિકો તૈનાત, પાકિસ્તાનને આપશે જડબાતોડ જવાબ

ન્યૂ દિલ્હીઃ ભારતીય સેનાએ આંતરિક સુરક્ષા અને યુદ્ધમાં ભાગ લેવાના ઉદ્દેશથી પહેલીવાર પાકિસ્તાન પાસે નિયંત્રણ રેખા (LoC)નજીક પોતાની મહિલા સૈનિકોને તૈનાત કરી છે. આ મહિલા સૈનિકોને અર્ધલશ્કરી દળ આસામ રાઈફલ્સના ડેપ્યુટેશન પર ઉત્તર કાશ્મીરના તંગધાર સેક્ટરમાં તૈનાત કરવામાં આવી છે.

લગભગ 30 જેટલા મહિલા જવાનોની આગેવાની કેપ્ટન ગુરસિમરન કૌર કરી રહ્યા છે, જેઓ આર્મી સર્વિસ કોર્પ્સ (ASC)થી છે. તેઓ પોતાના પરિવારની ત્રીજી પેઢીના સૈન્ય અધિકારી છે. એક અધિકારીએ જણાવ્યું હતું કે, 'મહિલા સૈનિકોને ભીડ નિયંત્રણ અને મહિલા સુરક્ષા માટે LoC નજીક સિક્યોરિટી ચેકપોઈન્ટ્સ પર તૈનાત કરવામાં આવી છે. અહીંયા સરહદ પારથી હથિયાર અને ડ્રગ્સની દાણચોરી અંગેની માહિતી ઈન્ટેલિજન્સ ઈનપુટ તરફથી મળતી રહે છે'.

13 લાખ જવાનોની ક્ષમતાવાળી ઈન્ડિયન આર્મી 1990થી સીમિત સંખ્યામાં મહિલાઓને ઓફિસર લેવલ પર જ સામેલ કરી રહી છે. મહિલાઓને ફાઈટિંગ આર્મ્સ, આર્મર્ડ કોર્પ્સ, મેકનાઈઝ્ડ ઇન્ફન્ટ્રી અને આર્ટિલરીમાં સામેલ કરાતી નથી. ગયા વર્ષે આર્મીએ 50 મહિલાઓને કોર્પ્સ ઓફ મિલિટ્રી પોલીસ (CMP)માં સામેલ કરી હતી, જેઓ હાલ ટ્રેનિંગ લઈ રહી છે.

ઈન્ડિયન આર્મીની યોજના લગભગ 800 મહિલાઓને મિલિટ્રી પોલીસમાં સામેલ કરવાની છે. જે અંતર્ગત ગુનાહિત મામલા, બળાત્કાર, છેડતીની સાથે-સાથે મિલિટ્રી ફોર્મેશનોમાં ઉચિત અનુશાસન સુનિશ્ચિત કરવા માટે દર વર્ષે 50 મહિલાઓની ભરતી કરવામાં આવશે.

'ફ્રિસ્કિંગ અને અન્ય ફરજો માટે આગળના સ્થળો પર મહિલા સૈનિકોની જરુરિયાત પણ અનુભવાઈ. મહિલા પોલીસ કર્મચારી હંમેશા આવા વિસ્તારોમાં ઉપલબ્ધ હોતા નથી. મહિલાઓ ખરેખર CMP સેવામાં જોડાશે ત્યાં સુધી આસામ રાઈફલ્સની મહિલા સૈનિકો આ ફરજો નિભાવશે', તેમ અધિકારીએ જણાવ્યું હતું.