અન્ય મહિલા સાથે પકડાયેલા સીનિયર IPSએ પત્નીના વાળ ખેંચીને મારઝૂડ કરી, વિડીયો વાઈરલ

ભોપાલઃ સ્પેશિયલ ડીજી પુરુષોત્તમ શર્મા ફરી એકવાર વિવાદોમાં છે. IPS પુરુષોત્તમ શર્માએ તેમની પત્ની સાથે મારઝૂડ કરી છે. પિટાઈનો આ વિડીયો સોશિયલ મીડિયામાં હવે વાઈરલ થઈ રહ્યો છે. પત્નીનો આરોપ છે કે, આઈપીએસ શર્માના કોઈ અન્ય મહિલા સાથે સંબંધ છે. આ વાતને લઈને પતિ-પત્નીમાં વિવાદ થયો હતો. આ બાદ ગુસ્સે થયેલા ડીજી પુરુષોત્તમ શર્માએ પત્નીની ઘરમાં પિટાઈ શરૂ કરી દીધી. પત્નીએ બચાવમાં પુરુષોત્તમ શર્મા પર કાતર વડે હુમલો કર્યો. ત્યાં ઘરમાં જ ઉપસ્થિત અન્ય વ્યક્તિએ ઘટનાનો વિડીયો ઉતારી લીધો છે. પુરુષોત્તમ શર્માના દીકરાએ તેની ફરિયાદ મુખ્યમંત્રી અને ગૃહમંત્રીને કરી છે અને પિતા ઉપર કાર્યવાહી કરવાની માગણી કરી છે.

વાઈરલ વિડીયોમાં આઈપીએસ પુરુષોત્તમ શર્મા પોતાની પત્નીની પિટાઈ કરી રહ્યા છે. બચાવમાં પત્ની પણ તેમના પર કાતરથી હુમલો કરો છે. જ્યારે ઘરના બે કર્મચારીઓ બચાવવા વચ્ચે પડ્યા છે. પરંતુ પુરુષોત્તમ શર્મા તેમની પત્નીને અપશબ્દો બોલી રહ્યા છે. હવે તેમના દીકરાએ પિતાની કરતૂતનો વિડીયો મધ્ય પ્રદેશના ગૃહમંત્રી નરોત્તમ મિશ્રા, ડીજીપી અને અન્ય પોલીસ અધિકારીઓને મોકલ્યો છે. જોકે વિડીયો સામે આવ્યા બાદ પોલીસ અધિકારીઓએ ચુપ્પી સાધી લીધી છે. પરંતુ હજુ સુધી પુરુષોત્તમ શર્મા પર કોઈ કાર્યવાહી કરવામાં આવી નથી.

કાર્યવાહીની માગણી
વિડીયોમાં આઈપીએસ પુરુષોત્તમ શર્માની કરતૂત શર્મસાર કરવારી છે. હવે તેમના પર કાર્યવાહી કરવાની માગણી ઉઠી રહી છે. જોકે સરકાર તરફથી હજુ સુધી કોઈ કાર્યવાહી કરાઈ નથી. જ્યારે તેમના દીકરા પાર્થ ગૌતમ શર્માએ તેની ફરિયાદ શિવરાજ સિંહ ચૌહાણ અને ગૃહમંત્રી નરોત્તમ મિશ્રાને કરી છે. એવામાં હવે શિવરાજ સરકાર આ મામલે શું નિર્ણય લે છે તેના પર સૌ કોઈની નજર ટકેલી છે.

હનીટ્રેપ મામલામાં પુરુષોત્તમ શર્મા ચર્ચા
આ પહેલા એસટીએફના ડીજી રહેતા પણ પુરુષોત્તમ શર્મા ચર્ચામાં આવ્યા હતા. હનીટ્રેપ કાંડ દરમિયાન તેમનું ખૂબ નામ ઉછળ્યું હતું. સાથે જ પ્રદેશની બહાર એસટીએફના એપ પ્લોટની પણ ખૂબ ચર્ચા થઈ હતી. તકરાર એટલી વધી ગઈ કે પ્રદેશના ડીજીપી અને આ અધિકારી આમને સામને આવી ગયા હતા. આ બાદ તે સમયની કમલનાથ સરકારે પુરુષોત્તમ શર્માને પદ પરથી હટાવી દીધા હતા.

જાણકારી મુજબ, પુરુષોત્તમ શર્માના દીકરા પાર્થ ગૌતમ શર્મા પણ આઈઆરએસ અધિકારી છે. ચર્ચા છે કે દીકરાએ જ આ વિડીયો જાહેર કર્યો છે. પોલીસના મોટા અધિકારીનો મામલો હોવાથી અન્ય અધિકારીઓ પણ હજુ ચુપ છે. હનીટ્રેપ મામલામાં જ્યારે પુરુષોત્તમ શર્માનું નામ ઉછળ્યું હતું ત્યારે તેમણે કહ્યું હતું કે, મને બદનામ કરવાનો ષડયંત્ર કરવામાં આવ્યું છે.

જ્યારે વાઈરલ વિડીયો પર ડીજી પુરુષોત્તમ શર્માએ મીડિયા સાથે વાત કરતા કહ્યું કે, આ મારો અંગત પારિવારિક મામલો છે. હું આ સંબંધથી કંટાળી ગયો છું. આગળની કાર્યવાહી માટે હું તૈયાર છું. મારા હાથમાં કોઈ હથિયાર નહોતું. પત્નીના હાથમાં કાતર હતી. વાઈરલ વિડીયોમાં ડીજી પુરુષોત્તમ શર્મા પત્નીને ધમકાવી રહ્યા છે કે તું પોલીસ સ્ટેશનમાં રિપોર્ટ લખાવ.