ગણિતની ટ્રિક દ્વારા મેળવી લીધો ઈ-વોલેટ PIN, પછી કરી છેતરપિંડી

નવી મુંબઈઃ ઓન-લાઈન છેતરપિંડી કરવા માટે લોકો જાત-જાતની ટ્રિક્સ અપનાવતા હોય છે. જેમાં હવે છેતરપિંડી આચરવા માટે મેથ્સ ટ્રિકનો ઉપયોગ કરવામાં આવ્યો છે. છેતરપિંડી કરનારા વ્યક્તિએ કામોથેના રહેવાસી વ્યક્તિનો ગુગલ પે આઈડ મેળવવા માટે મેથ્સ ટ્રિકનો ઉપયોગ કર્યો હતો. છેતરપિંડી કરનારાએ તે વ્યક્તિને તેના બેંક એકાઉન્ટ નંબરના અંતિમ ચાર નંબરમાંથી તેના ગુગલ પે આઈડીના પાસવર્ડના ચાર આંકડાની બાદબાકી કરવાનું કહ્યું હતું. વ્યક્તિએ બાદબાકીનો જે જવાબ આવ્યો તે શેર કર્યો હતો. જેના આધારે છેતરપિંડી કરનારાએ ભોગ બનનારા વ્યક્તિના બેંક એકાઉન્ટમાંથી બે ટ્રાન્ઝેક્શન દ્વારા 88,421 રૂપિયા ઉપાડી લીધા હતા.

ભોગ બનનારા એક વ્યક્તિએ એક ટિશર્ટ રિટર્ન કરવા માટે ઈ-કોમર્સ સાઈટનો કસ્ટમર કેર નંબર શોધવા માટે ઓન-લાઈન સર્ચ કર્યું હતું અને ત્યારબાદ તેની સાથે છેતરપિંડી થઈ હતી. કામોથે પોલીસ સ્ટેશનમાં નોંધાવેલી એફઆઈઆરમાં 24 વર્ષીય ઓમકાર સાવંતે કહ્યું હતું કે તેની સાથે 11 જાન્યુઆરીએ આ ઘટના બની હતી.

ત્યારબાદ તે પોતાનું જ્યાં સેવિંગ એકાઉન્ટ છે ત્યાં બેંકમાં ગયો હતો અને એક ફોર્મ ભર્યું હતું. બેંકે બાદમાં તપાસ કરી હતી અને એક મહિના બાદ સાવંતને રિપોર્ટ મોકલ્યો હતો જેમાં તેમણે કહ્યું હતું કે આ ગ્રાહકની જવાબદારી છે અને જે છેતરપિંડી થઈ છે તે રકમ બેંકે આપી ન હતી. સાવંતે 15 ફેબ્રુઆરીએ અજાણ્યા શખ્સ સામે ફરિયાદ નોંધાવી હતી.

સાવાંતે જણાવ્યું હતું કે તેણે જાન્યુઆરીમાં એક ઈ-કોમર્સ સાઈટ પરથી એક ટિશર્ટ ખરીદી હતી. પરંતુ જે ટિશર્ટ તેને મળી હતી તે તેની સાઈઝ પ્રમાણે ન હતી. તેથી તેણે તેને પરત કરવાનો નિર્ણય લીધો હતો. ઈ-કોમર્સ સાઈટનો કસ્ટમર કેર નંબર શોધવા માટે તેણે ગૂગલ પર સર્ચ કર્યું હતું અને તેને એક મોબાઈલ નંબર મળ્યો હતો.

તેને જે નંબર મળ્યો તેના પર સંપર્ક કરતા સામેવાળી વ્યક્તિએ પોતે તે ઈ-કોમર્સ સાઈટનો રિપ્રેઝન્ટેટિવ છે તેવો દાવો કર્યો હતો. તેણે કહ્યું હતું કે કેશ રિફન્ડ મળી શકે નહીં પરંતુ તેણે સાવંતને તેનો નંબર જે ગુગલ પે આઈડી સાથે જોડાયેલો છે તે આપવાનું કહ્યું હતું. તેણે કહ્યું હતું કે તેના રૂપિયા તેના ઈ-વોલેટ સાથે જોડાયેલા બેંક એકાઉન્ટમાં જમા થઈ જશે.

બાદમાં તેણે તેનો પિન મેળવવા માટે ગણિતની એક ટ્રિકનો ઉપયોગ કર્યો હતો અને છેતરપિંડી કરી હતી. તેણે સાવંતના એકાઉન્ટમાંથી બે ટ્રાન્ઝેક્શન અંતર્ગત 72,900 અને 15,521 રૂપિયા ઉપાડી લીધા હતા.