કોરોનાનો કહેર: UP સરકારના કેબિનેટ મંત્રી કમલ રાનીનું નિધન

ઉત્તર પ્રદેશની સરકારમાં રાજ્યમંત્રી કમલ રાની વરુણનું રવિવારે નિધન થઈ ગયું. 18 જુલાઈએ તેઓ કોરોના પોઝિટિવ મળી આવ્યા હતા. તેમની સારવાર યુપીની રાજધાની લખનઉની SGPGI હોસ્પિટલમાં ચાલી રહી હતી. રવિવારે સવારે તેમણે અંતિમ શ્વાસ લીધા. ઉત્તર પ્રદેશમાં કોઈ મંત્રીનું કોરોનાથી આ પહેલું મોત થયું છે.

કમલ રાની વરુણ યોગી સરકારમાં ટેકનિકલ એજ્યુકેશન મિનિસ્ટર હતા. રાજ્યમંત્રી કમલ રાની વરુણની તબિયત ખરાબ થયા બાદ તેમનું સેમ્પલ તપાસ માટે સિવિલ હોસ્પિટલમાં મોકલવામાં આવ્યું હતું. 18 જુલાઈએ તેમની રિપોર્ટ આવી હતી. રિપોર્ટ આવ્યા બાદ તેમને SGPGIમાં એડમિટ કરાવાયા હતા.


ઉત્તર પ્રદેશના મુખ્યમંત્રી યોગી આદિત્યનાથે તેમના નિધન પર શોક વ્યક્ત કરતા શ્રદ્ધાંજલિ આપી હતી અને તેમના પરિજનો પ્રત્યે સંવેદના વ્યક્ત કરી. યોગીએ કહ્યું, ઘણા દિવસોથી પ્રદેશની પ્રતિષ્ઠિત હોસ્પિટલમાં તેમની સારવાર ચાલી રહી હતી. તેઓ કોરોના વાયરસથી સંક્રમિત હતા. આજે સવારે તેમનું દુઃખદ નિધન થઈ ગયું.

લેખનઉમાં જન્મ થયો, કાનપુરમાં લગ્ન
કમલ રાની વરુણનો જન્મ લખનઉમાં 3 મે 1958માં થયો હતો. તેમના લગ્ન કાનપુરના રહેનારા કિશન લાલ વરુણ સાથે થયા હતા. કિશન લાલ એલઆઈસીમાં પ્રશાસનિક અધિકારી અને RSSના પ્રતિબદ્ધ સ્વયંસેવક હતા. કમલ રાનીએ 1977થી રાજનીતિમાં પ્રવેશ કર્યો હતો. તેમણે પોતાના રાજનીતિક કરિયરની શરૂઆત ઝૂંપડપટ્ટીથી કરી હતી. અહીં તેઓ સેવા ભારતી સેવા કેન્દ્રમાં બાળકોને ભણાવવા અને ગરીબ મહિલાઓને સિવણ કામ, ભરત-ગૂંથણની ટ્રેનિંગ આપતા હતા.

આ રીતે શરૂ થયું રાજકીય કરિયર
1989માં તેઓ કાનપુરના દ્વારિકાપુરી વોર્ડથી ભાજપની ટિકિટ પર કાઉન્સિલર બન્યા. 1995માં તેઓ બીજી વખત કાઉન્સિલરની ચૂંટણી જીત્યા. ભાજપે 1996માં તેમને ઘાટમપુર સંસદીય સીટ પરથી ચૂંટણી માટે મેદાનમાં ઉતાર્યા. તેઓ 1998માં પણ આ જ સીટ પરથી ચૂંટણી જીત્યા. જોકે 1999ની લોકસભા ચૂંટણીમાં તેઓ 585 વોટથી હારી ગયા હતા.

ઉલ્લેખનીય છે કે ઉત્તર પ્રદેશમાં કોરોના વાયરસના કેસોની સંખ્યામાં સતત વધારો થઈ રહ્યો છે. અહીં શનિવાર સાંજ સુધીમાં 24 કલાકમાં કોરોનાના 3,840 નવા કેસ આવ્યા હતા. જ્યારે 47 લોકોના મોત થયા હતા. હવે યુપીમાં કુલ કેસોની સંખ્યા 36 હજારને પાર પહોંચી ગઈ છે, જ્યારે 1677થી વધુ લોકોના મોત થઈ ચૂક્યા છે.