1000 કરોડથી વધારેનું હવાલા કૌભાંડ, ચીનની સંડોવણી બહાર આવી

નવી દિલ્હીઃ ભારતમાં મની લોન્ડરિંગના મોટા રેકેટનો ખુલાસો થયો છે. 1000 કરોડથી વધારેના હવાલા ટ્રાન્જેક્શન સામે આવ્યું છે. ગુપ્ત માહિતીના આધારે ઈનકમ ટેક્સ ડિપાર્ટમેન્ટે કેટલાક ચાઈનીઝ નાગરિકો અને તેમના ભારતીય સહયોગીઓની જગ્યાઓ પર તપાસ હાથ ધરી હતી. આ દરમિયાન કેટલાક ચાઈનીઝ લોકો ભારતમાં પોતાના સહયોગીઓ સાથે મળીને મની લોન્ડરિંગ અને હવાલા ટ્રાન્જેક્શનનું કામ કરી રહ્યા હતા.


આ માહિતાના આધારે ઈનકમ ટેક્સ ડિપાર્ટમેન્ટે ચાઈનીઝ નાગરિકો, ભારતમાં તેમના સહયોગીઓ, ચાઈનીઝ કંપનીઓ સહિત કેટલાક બેંકના કર્મચારીઓના ઘર પર રેડ કરી તપાસ હાથ ધરી હતી. કહેવામાં આવી રહ્યું છે કે આ ખુબ જ મોટું નેક્સસ છે જે નકલી કંપનીઓને આધારે હવાલા કૌભાંડ કરવામાં આવી રહ્યું હતું.

તપાસ દરમિયાન જાણવા મળ્યું કે ચાઈનીસ લોકોના કહેવાથી અંદાજીત 40 બેંક એકાઉન્ટ ડમી શાખાઓના નામે ખોલવામાં આવ્યા હતા. આ ખાતાઓમાં અંદાજીત 1000 કરોડ રૂપિયા ક્રેડિટ કરવામાં આવ્યા હતા.

ચાઈનીઝ કંપનીઓની સબ્સિડિયરી કંપનીઓ અને સંબંધિત લોકોએ શેલ કંપની બનાવી ભારતમાં નકલી બિઝનેસ કરવાના નામ પર અંદાજીત 100 કરોડ એડવાન્સ લીધા છે. તપાસ દરમિયાન સામે આવ્યું છે કે આ પૈસાથી હવાલા બિઝનેસ કરવામાં આવ્યો છે. આ કામમાં અનેક બેંક કર્મચારી અને ચાર્ટર્ડ એકાઉન્ટ સંડોવાયેલા છે.

હવાલા કૌભાંડની તપાસમાં અમેરિકન ડોલર અને હોન્ગ કોન્ગમાં ટ્રાન્જેક્શન કરવામાં આવેલા છે. હાલ તમામ પાસાઓ પર ગંભીરતાથી તપાસ કરવામાં આવી રહી છે.