હવાલા ઓપરેટર્સ પર આઈટીના દરોડા, જપ્ત કર્યા 62 કરોડ રૂપિયા

નવી દિલ્હીઃ ઈનકમ ટેક્સ વિભાગે હવાલા ઓપરેટર્સ સામે મોટી કાર્યવાહી કરતા 62 કરોડ રૂપિયા જપ્ત કર્યા છે. આઈટી વિભાગે એકથી વધુ શહેરોમાં ઓપરેશન હાથ ધર્યું હતું અને તેમાં ખોટા બિલો તૈયાર કરનારા હવાલા તથા એન્ટ્રી ઓપરેટર્સ પર રેડ પાડી હતી. અધિકારીઓએ જણાવ્યું હતું કે તેમાં 62 કરોડ રૂપિયા જપ્ત કરવામાં આવ્યા હતા. અધિકારીઓએ જણાવ્યું હતું કે આ રૂપિયાનો કોઈ હિસાબ ન હતો અને તે વિવિધ જગ્યાઓથી જપ્ત કરવામાં આવ્યા હતા જેમાં સંજય જૈન નામના એક વ્યક્તિની ઓળખ થઈ હતી.

આઈટી વિભાગે દિલ્હી-એનસીઆર, હરિયાણા, પંજાબ, ઉત્તરાખંડ અને ગોવામાં વિવિધ જગ્યાઓએ સોમવારે રેડ પાડી હતી. એક અધિકારીએ જણાવ્યું હતું કે કથિત ગેરકાયદેસર લેવડ-દેવડ થઈ હતી જે 500 કરોડ રૂપિયાના હવાલા રેકેટ તરફ ઈશારો કરે છે. જે જગ્યાઓએ રેડ પાડવામાં આવી હતી ત્યાં 2000 અને 500 કરોડ રૂપિયાની નોટો લાકડાના કબાટો અને ફર્નિચરમાંથી મળી આવી હતી.

સીબીડીટી એ અગાઉ જણાવ્યું હતું કે એન્ટ્રી ઓપરેશન (હવાલા જેવું ઓપરેશન) અને ખોટા બિલો દ્વારા મોટા પ્રમાણમાં રોકડ રકમ એકઠી કરતા મોટા નેટવર્ક સામે આ કાર્યવાહી કરવામાં આવી હતી. મંગળવારે જાહેર કરવામાં આવેલા નિવેદનમાં બોર્ડે કહ્યું હતું કે, 2.37 કરોડની રોકડ તથા 2.89 કરોડ રૂપિયાના દાગીના મળ્યા છે. આ ઉપરાંત 17 બેંક લોકર્સ પણ મળ્યા છે જેની તપાસ હજી બાકી છે.

સેન્ટ્રલ બોર્ડ ઓફ ડાયરેક્ટ ટેક્સીસ (સીબીડીટી) આઈટી વિભાગ માટેની એડમિનિસ્ટ્રેટિવ ઓથોરિટી છે. બોર્ડ દ્વારા જણાવવામાં આવ્યું હતું કે, આ રેડથી એન્ટ્રી ઓપરેટર્સ, ઈન્ટરમિડિએરિસ, કેશ હેન્ડલર્સ, બેનિફિસિયરિસ અને કંપનીઓમાં સમગ્ર નેટવર્કને ખુલ્લુ પડ્યું છે. અત્યાર સુધી 500 કરોડ રૂપિયાના હવાલાને લગતા દસ્તાવેજો મળી આવ્યા છે અને તેને જપ્ત કરી લેવામાં આવ્યા છે.

ટેક્સ ચોરીના રેકેટની મોડસ ઓપરેન્ડી અંગે જણાવતા બોર્ડે કહ્યું હતું કે, વ્યક્તિગત સ્ટાફ, કર્મચારીઓ, કંપની સાથે જોડાયેલાઓને આ ખોટી કંપનીઓના ખોટા ડાયરેક્ટર્સ અને ભાગીદાર બનાવવામાં આવ્યા હતા. આ ઉપરાંત તમામ બેંક એકાઉન્ટ્સનું મેનેજમેન્ટ અને નિયંત્રણ આ એન્ટ્રી ઓપરેટર્સ દ્વારા કરવામાં આવી હતી.