Messenger Apps Ban:ભારતે 'ત્રાસવાદીઓના ફેવરિટ' 14 મોબાઈલ મેસેન્જર એપ્સ પર પ્રતિબંધ મુક્યો

ભારતની સુરક્ષાને જોખમમાં મુકી શકે તેવા કેટલાક મોબાઈલ મેસેન્જર એપ્સ પર સરકારે પ્રતિબંધ મુકી દીધો છે. સરકારની દલીલ છે કે અમુક ત્રાસવાદીઓ આ મોબાઈલ મેસેન્જર એપ્સનો ઉપયોગ કરીને પાકિસ્તાન સાથે સંપર્કમાં રહેતા હતા અને ત્યાંથી સંદેશ મેળવતા હતા.

કેન્દ્ર સરકારે કુલ 14 મોબાઈલ મેસેન્જર એપ્સ પર પ્રતિબંધ મુક્યો છે. ઘણા ત્રાસવાદીઓ આ એપ્સ દ્વારા પાકિસ્તાનથી મેસેજ મેળવતા હતા અને તેને ફેલાવતા હતા. ખાસ કરીને જમ્મુ અને કાશ્મીરમાં ત્રાસવાદીઓ દ્વારા આ એપ્સનો ઉપયોગ થતો હતો. કાશ્મીરમાં ત્રાસવાદીઓ પોતાના સમર્થકો સાથે કોન્ટેક્ટમાં રહેવા અને મેસેજની આપલે કરવા માટે આ એપ્સ વાપરતા હતા તેવું કહેવામાં આવે છે.

કયા મોબાઈલ મેસેન્જર એપ્સને પ્રતિબંધિત કરવામાં આવ્યા છે તેના નામ હજુ જાહેર નથી થયા. પરંતુ Crypviser, Enigma, Safeswiss, Wickrme, Mediafire, Briar, BChat, Nandbox, Conion, IMO, Element, Second line, Zangi, Threema વગેરે મોબાઈલ મેસેન્જર એપ્સને પ્રતિબંધિત કરવામાં આવ્યા હોય તેમ લાગે છે. અગાઉ ચાઈનીઝ એપ્સ પર પ્રતિબંધ મુકવામાં આવ્યો ત્યારે સરકારે જણાવ્યું હતું કે આ એપ્સથી ભારતની સુરક્ષા સામે ખતરો પેદા થાય છે અને તેનાથી દેશનું ડિફેન્સ જોખમાય છે.

જૂન 2020થી અત્યાર સુધીમાં સરકારે 200થી વધારે ચાઈનીઝ એપ્સ પર પ્રતિબંધ મુક્યો છે. તેમાં ટિકટોક, Shareit, WeChat, Helo, Likee, UC News, Bigo Live, UC Browser, Xender, Camscanner સામેલ છે. આ ઉપરાંત જાણીતી મોબાઈલ ગેમ PUBG મોબાઈલ અને Garena Free Fire પર પણ પ્રતિબંધ મુકવામાં આવ્યો છે.

ત્રાસવાદીઓ દ્વારા ચીનના એપ્સનો વધારે ઉપયોગ કરવામાં આવે છે કારણ કે તે ભારતીય સત્તાવાળાઓ દ્વારા આંતરી શકાતા નથી અને તેઓ આસાનીથી પાકિસ્તાન સ્થિત પોતાના ઓપરેટર સાથે સંપર્કમાં રહી શકે છે. મોબાઈલ મેસેન્જર એપ્સ દ્વારા ત્રાસવાદીઓ વચ્ચે વર્ષોથી કોમ્યુનિકેશન થાય છે અને ભારતીય સુરક્ષા એજન્સીઓ માટે તે પહેલેથી એક પડકારજનક મુદ્દો રહ્યો છે.