કોરોનાના નવા કેસ મામલે ભારત બીજા નંબરે સરક્યું, અમેરિકા ફરી પહેલું બન્યું

નવી દિલ્હીઃ આશરે બે મહિના સુધી દુનિયામાં પ્રતિ દિવસ નવા કોરોના કેસ મામલે મોખરે રહ્યા બાદ ભારત બીજા નંબર પર આવી ગયું છે. છેલ્લા બે દિવસથી ગુરુવાર અને શુક્રવારથી સતત અમેરિકામાં ભારત કરતા વધુ નવા કોરોના કેસ પ્રતિ દિવસ નોંધાઈ રહ્યા છે. 6 ઓગસ્ટથી અત્યાર સુધી ભારતમાં સતત સૌથી વધુ સિંગલ ડે કાઉન્ટ આવતા હતા.

worldometers.info મુજબ ગુરુવાર અને શુક્રવારે અમેરિકામાં ક્રમાનુસાર 66,131 અને 71,687 નવા કોરોના સંક્રમણના કેસ નોંધાયા છે. જ્યારે ભારતમાં આ દિવસોમાં દૈનિક નવા કોરોના સંક્રમણના કેસ ક્રમાનુસાર 64,237 અને 62,587 સામે આવ્યા છે. ગુરુવારથી અમેરિકામાં ફરી એકવાર નવા સંક્રમણના કેસ સામે આવી રહ્યા છે.

71 દિવસ પછી અમેરિકા ફરી એકવાર દૈનિક કોરોના કેસ મામલે દુનિયામાં નંબર વન પર આવી ગયું છે. આ 71 દિવસ દરમિયાન ભારત આ મામલે નંબર વન રહ્યું હતું. જ્યારે ટોટલ કોરોના કેસની વાત કરવામાં આવે તો અમેરિકા દુનિયામાં સૌથી વધુ 8.3 મિલિયન કેસ સાથે નંબર વન પર છે જ્યારે ભારત તેનાથી ઘણું પાછળ 7.5 મિલિયન કેસ સાથે બીજા નંબરે છે.

હાલના તબક્કે નિષ્ણાંતો જણાવી રહ્યા છે કે આગામી કેટલાક સપ્તાહ અમેરિકા ફરી દુનિયામાં સૌથી વધુ દૈનિક કેસના આંકડા સાથે મોખરે રહી શકે છે. કારણ કે છેલ્લા એક મહિનાથી અમેરિકામાં ધીરે ધીરે નવા કેસ વધી રહ્યા છે જ્યારે ભારતમાં છેલ્લા 15 દિવસથી દૈનિક નવા કેસમાં ઘટાડો નોંધાઈ રહ્યો છે. ભારતમાં 17 સપ્ટેમ્બરના રોજ 98000 દૈનિક કોરોના કેસ નોંધાયા બાદ સતત આંકડો સતત ઘટી રહ્યો છે. જ્યારે અમેરિકામાં મહામારીનો ત્રીજો તબક્કો શરું થયો હોવાનું લાગી રહ્યું છે.

મહત્વનું છે કે જે સમયે ભારતમાં મહામારીમાં ઘટાડો નોંધાઈ રહ્યો છે ત્યારે જ અમેરિકામાં તેનાથી વિપરિત વધારો જોવા મળી રહ્યો છે. અને જ્યારે અમેરિકામાં કોરોના કેસમાં ઘટાડો જોવા મળી રહ્યો હતો ત્યારે ભારતમાં કેસ સતત વધી રહ્યો હતા.

આ દરમિયાન ભારતમાં શનિવારે 62,050 નવા કોરોના સંક્રમણના કેસ નોંધાયા છે. જે સાથે દેશમાં ટોટલ કેસની સંખ્યા 74.9 લાખ પહોંચી છે. જ્યારે દૈનિક મૃત્યુ આંક હજુ પણ 800ની ઉપર છે. શનિવારે દેશમાં કુલ 812 વ્યક્તિઓના કોરોનાથી મોત થયા હતા. દેશમાં કોરોનાના એપી સેન્ટર રહેલા મહારાષ્ટ્રમાં શનિવારે પણ નવા કેસ અને મૃત્યુ મામલે ઘટાડો નોંધાયો હતો. શનિવારે કુલ 10,259 કેસ નોંધાયા હતા જ્યારે 250 લોકોના મોત થયા હતા. આ સાથે મહારાષ્ટ્રના કુલ કોરોના કેસની સંખ્યા 15,86,321 પહોંચી છે જ્યારે કુલ મૃત્યુ આંક 41,965 પહોંચ્યો છે. મુંબઈમ3ં પણ કોરોના કેસમાં સતત ઘટોડો નોંધાઈ રહ્યો છે.

આ ઉપરાંત તામિલનાડુ, ઓડિશામાં પણ કેસમાં સતત ઘટાડો આવી રહ્યો છે. નિષ્ણાંતો મુજબ જો આ જ રીતે નવા કોરોના કેસમાં આગામી સપ્તાહ સુધી સતત ઘટાડો આવશે દો દેશમાં એક્ટિવ કોરોના કેસની સંખ્યા ઘણી નીચી આવી શકે છે.