ઐતિહાસિક સિદ્ધિઃ ભારતે સફળતા પૂર્વક કર્યું હાઈપરસોનિક વ્હીકલનું પરીક્ષણ

નવી દિલ્હીઃ દેશે રક્ષા ક્ષેત્રમાં મોટી સફળતા મેળવી છે. ડીઆરડીઓએ સફળતાપૂર્વક HSTDVનો ફ્લાઈટ ટેસ્ટ કર્યો છે. HSTDV નો અર્થ છે Hypersonic Technology Demonstrator Vehicle. આ એક ટેક્નોલોજી છે જેનો ઉપયોગ હાઈપરસોનિક અને ક્રૂઝ મિસાઈલોના લોન્ચમાં કરી શકાય છે. મોટી વાત એ છે કે આ હાઈટેક એરક્રાફ્ટ દેશમાં જ વિક્સિત કરાયું છે. HSTDVના સફળ પરીક્ષણ દેશના આત્મનિર્ભર પરાક્રમનું નવું પ્રમાણ છે. રક્ષા ક્ષેત્રમાં દેશની આત્મનિર્ભરતાની દિશામાં આ એક મોટું પગલું છે.


ડીઆરડીઓએ પોતાના આ મિશનને ઐતિહાસિક ગણાવ્યું છે. DRDOએ ટ્વિટ કરીને કહ્યું કે આ મિશનની સાથે જ એ સાબિત થઈ ગયું છે કે DRDO હાઈલી કોમ્પલેક્સ ટેક્નોલોજીના ક્ષેત્રમાં ઉમદા પ્રદર્શન કરી શકે છે. આ ઔદ્યોગિક જગતની સાથે આગામી પેઢીના હાઈપરસોનિક વાહનોના નિર્માણનો રસ્તો ખોલનારું છે.


રક્ષામંત્રી રાજનાથ સિંહે DRDOને આ સફળતા પર શુભેચ્છાઓ પાઠવી. રક્ષામંત્રી રાજનાથ સિંહે ટ્વીટ કરીને કહ્યું કે DRDOએ આજે સ્વદેશી રીતે વિક્સિત સ્કેમજેટ પ્રોપલ્શન સિસ્ટમનો ઉપયોગ કરીને હાઈપરસોનિક ટેક્નોલોજી ડેમોન્સ્ટ્રેટર વ્હીકલનું સફળતાપૂર્વક પરીક્ષણ કર્યું છે. આ સફળતાની સાથે તમામ મહત્વપૂર્ણ ટેક્નોલોજીઓ હવે આગામી તબક્કાની પ્રગતિ માટે સ્થાપિત થઈ ગઈ છે.

તેમણે વધુમાં કહ્યું કે ડીઆરડીઓ પ્રધાનમંત્રી નરેન્દ્ર મોદીના આત્મનિર્ભર ભારતના વિઝનને આગળ વધારે છે. મે આ પ્રોજેક્ટ સાથે જોડાયેલા વૈજ્ઞાનિકો સાથે વાત કરી અને તેમને આ મહાન ઉપલબ્ધિ માટે શુભેચ્છા પાઠવી. ભારતને તેમના પર ગર્વ છે.

શું છે હાઇપરસોનિક ટેકનોલોજી ડેમોનસ્ટ્રેટર

હાઇપરસોનિક ટેકનોલોજી ડેમોનસ્ટ્રેટર વાહનનું આજે સફળતાપૂર્વક પરીક્ષણ કરવામાં આવ્યું. આ પહેલા જૂન 2019માં તેનું પ્રથમ પરીક્ષણ કરવામાં આવ્યું હતું. તેનો ઉપયોગ હાઇપરસોનિક ક્રૂઝ મિસાઇલો બનાવવા અને ખૂબ ઓછા ખર્ચે સેટેલાઇટ લોંચિંગ માટે કરવામાં આવશે. સાથો સાથ હાઇપરસોનિક અને લાંબા અંતરની ક્રૂઝ મિસાઇલો માટે યાન બનાવા માટે ઉપયોગ કરાશે.


હાઇપરસોનિક ટેકનોલોજી ડેમોનસ્ટ્રેટર વાહન, હાઇપરસોનિક ક્રૂઝ મિસાઇલ સિસ્ટમ વિકસાવવા માટે દેશના મહત્વાકાંક્ષી કાર્યક્રમનો એક મહત્વપૂર્ણ ભાગ છે. ભારત એ ટોચના દેશોની કલબમાં સામેલ થઇ ગયું છે જેની પાસે આ તકનીકી છે. અમેરિકા, રૂસ અને ચીન બાદ ભારત ચોથો એવો દેશ જેને આ તકનીકીને વિકસિત કરી છે.