ભારતની સરહદમાં આવી ગયેલા ચીની સૈનિકને સેનાએ પરત કર્યો

નવી દિલ્હીઃ ભારત અને ચીન વચ્ચે (India China Clash) વચ્ચે LAC પર તણાવ હજુ પણ ચાલુ છે. ગત સોમવારે એક ચીની સૈનિક LAC પર પહોંચી ગયો હતો. જેને ભારતીય સેનાએ પકડી લીધો હતો. PLA સૈનિકને પૂર્વી લદ્દાખના ચુમાર-ડેમચોક વિસ્તારમાં પકડી પાડવામાં આવ્યો હતો. મંગળવારે લદ્દાખ વિસ્તારમાં પકડાયેલ તે ચીની સૈનિકે ભારતે ચીનને પરત કરી દીધો છે. મંગળવારની મોડી રાત્રે ચુશૂલ મોલડો મીટિંગ પોઈન્ટ પર ચીનને સોંપવામાં આવ્યો હતો. ચીની સૈનિકનું નામ વાંગ યા લોંગ હતું.

ભારતીય સેનાની દરિયાદિલી

પૂર્વ લદ્દાખના ડેમચોક વિસ્તારથી 19 ઓક્ટોબરે વાંગ યા લોંગને પકડવામાં આવ્યો હતો. વાંગ ભટકતાં ભટકતાં LAC પાર કરીને ભારતીય સીમામાં ઘૂસી ગયો હતો. આ દરમિયાન ભારતીય સેનાએ ચીની સૈનિકને ઠંડીથી બચવા માટે મેડિકલ મદદની સાથે ખાવાપીવાનું અને ગરમ કપડાં પણ આપ્યા હતા. સૈનિકને પરત કરી દેતાં ચીને ભારતનો આભાર પણ માન્યો હતો.

ચીની સૈનિક પરત કરવા કરી હતી વિનંતી

ચીની સેનાએ પોતાના લાપતા સૈનિકને વાપસ કરવા માટે વિનંતી કરી હતી. જે બાદ ભારતીય અધિકારીઓએ પ્રોટોકોલ હેઠળ તમામ ઔપચારિકતાઓ પૂરી કરીને વાંગને ચીનને પરત સોંપી દીધો હતો. જણાવી દઈએ કે, મે મહિનાના પહેલા અઠવાડિયાથી ભારતીય અને ચીની સૈનિક આમને સામને છે. બંને દેશો વચ્ચે તણાવ ચરમ પર છે.