એક સમયે 50 રુપિયામાં નાસ્તાની ફેક્ટરીમાં કામ કરતા હતા, બન્યા સેનામાં અધિકારી

દેહરાદૂનઃ 'મન હોય તો માળવે જવાય' એ કહેવતને સેના અધિકારીએ સાર્થક કરી છે. કહેવાય છે કે લક્ષ્ય વગરનું જીવન નીરસ બની જતું હોય છે, આવામાં જીવનમાં સફળ થવા માટે કોઈ એક લક્ષ્ય બનાવીને આગળ વધવું જોઈએ તો ચોક્કસ સફળતા મળે છે. 28 વર્ષના ખેડૂતના દીકરા બાલબાંકા તિવારી જણાવે છે કે તેઓ પોતાના વિશ્વાસ અને દૃઢતાના કારણે અહીં સુધી પહોંચ્યા છે. બાલબાંકા સેનામાં એક સિપાહીથી ઓફિસર બનતા જોઈને તેમની માતા મુન્ની દેવીની આંખો ભરાઈ આવે છે. તેએ દિવસોને યાદ કરીને જણાવે છે કે, જ્યારે મારા દીકરાએ પરિવારની આવકને ટેકો આપવા માટે 16 વર્ષની ઉંમરમાં કામ કરવાનું શરુ કર્યું હતું. તેઓ 50-100 રુપિયા માટે દિવસમાં 12 કલાક કામ કરતા હતા.

ઈન્ડિયન મિલિટરી એકેડમી (IMA)એ શનિવારે ગ્રેજ્યુએટ થયેલા બાલબાંકા બિહારના આરા જિલ્લાના નિવાસી છે. એક ખેડૂતના દીકરા બાલબાંકા અનુસાર વિશ્વાસ અને દૃઢતાના કારણે જ તેઓ આજે અહીં સુધી પહોંચ્યા છે. તેમણે કહ્યું, "12મા ધોરણ પછી હું આરાથી ઓડિશાના રાઉરકેલા ચાલ્યો ગયો. મેં લોખંડની ફેક્ટરીમાં કામ કરવાનું શરુ કર્યું. પછી નમકીન ફેક્ટરી સાથે જોડાઈ ગયો. જોકે, મેં મારું ભણવાનું ચાલુ રાખ્યું અને ટ્યુશન લેતો રહ્યો."


5 વર્ષ સુધી રહ્યા સિપાહી

તિવારી 2012માં ભોપાલના EME સેન્ટરમાં બીજા પ્રયત્નમાં જ પરીક્ષા પાસ કરી. આગામી પાંચ વર્ષમાં સિપાહી તરીકે કાર્ય કરીને બાલબાંકાએ આર્મી કેડેટ કૉલેજ માટે તૈયારી શરુ કરી અને 2017માં તેમને સફળતા મળી ગઈ. તિવારીએ કહ્યું, "હું ઘણો જ ખુશ છું કે હવે એક અધિકારી તરીકે દેશની સેવા કરવાની તક મળશે."

'હવે પિતા ગામમાં બધાને જણાવશે'

બાલબાંકા તિવારીને આર્મીમાં જવાની પ્રેરણા એક સગા પાસેથી મળી હતી. તેમણે જણાવ્યું કે, "તેમને ગામમાં મળનારી ઈજ્જતથી હું અભિભૂત હતો. મેં આર્મીમાં જોડાવાના સપનાને એક પળ માટે પણ નહોતું છોડ્યું. હવે મારા પિતા સવારે છાપામાં ખબર જોઈને આખા ગામમાં બધાને સફળતાની સફર વિશે જણાવશે."