હવે ભારતીય રેલવે કર્મચારીઓ પહેરશે રિતુ બેરીના ડિઝાઈનર ડ્રેસ

અત્યાર સુધી રેલવે સ્ટેશન સિવાય ફિલ્મોમાં પણ રેલવે સ્ટેશન માસ્ટર અથવા ટિકીટ ચેકરને તમે કાળા સફેદ યુનિફોર્મમાં જોયા હશે, પરંતુ હવે ટુંક સમયમાં આ છબિ બદલાવવાની છે. આ માટે રેલવે બોર્ડ દ્વારા તાજેતરમાં જ ભારતની ફેમસ ડિઝાઈનર રિતુ બેરીનો સમ્પર્ક સાધ્યો હતો અને તેમણે ચાર અલગ અલગ થીમ તૈયાર પણ કરી લીધી છે. રેલવે કર્મચારીઓના યૂનિફોર્મ માટે અમુક નવા આઈડિયાઝ લઈને તે રેલવે મંત્રી સુરેશ પ્રભુને મળી હતી. રિતુની ડિઝાઈન કરેલી થીમ ભારતીય કલ્ચર અને કલાને સંપુર્ણ રીતે સુટ કરે છે.

રિતુએ નવા યૂનિફોર્મ માટે ચાર ઑપ્શન આપ્યા છે. પહેલાં વિકલ્પમાં ભારતીય ટ્રાઈબલ આર્ટની ઝલક જોવા મળે છે, બીજ ઑપ્શનમાં દેશના પૌરાણિક સમયના સિક્કા અને મુદ્રા જણાય છે. ત્રીજા વિકલ્પમાં નવાબોની પરંપરાની ઝલક છે અને ચોથા વિકલ્પમાં ભારતીય નૃત્ય, કળા, વેપાર અને સંસ્કૃતિ વગેરેનું કૉમ્બિનેશન છે.

જાણવા મળ્યું છે કે રેલવે બોર્ડ અને મંત્રી પ્રભુની હાજરીમાં રિતુના આ નવા યુનિફોર્મના પ્રેઝન્ટેશન દરમિયાન રિતુને સલાહ આપી કે આની પસંદગી માટે સોશિયલ મીડિયાના માધ્યમથી સામાન્ય લોકોનો મત લેવામાં આવે.

અત્યારે કમિટી તેમની ડિઝાઈનનું મુલ્યાંકન, અલગ અલગ વિકલ્પોનો અભ્યાસ, કીંમત અને અનુકુળતા વગેરે જેવા પાસાઓ પર વિચાર વિમર્શ કરી રહી છે.