ચીનનું ષડયંત્ર નિષ્ફળ, પૈંગોંગના વિવાદિત ક્ષેત્ર પર ભારતીય સેનાએ કર્યો કબજો

ભારતીય સેનાએ લાઈન ઓફ એક્ચ્યુઅલ કન્ટ્રોલ (LAC)પર ચીની ષડયંત્રને નિષ્ફળ કરવા સાથે જ બ્લેક ટોપ પોસ્ટ પર કબજો કરી લીધો થે. 29-30 ઓગસ્ટની રાત્રે ચીની સેનાએ ઘુસણખોરીનો પ્રયાસ કર્યો, જેનો જવાબ આપતા ભારતીય સેનાએ ન માત્ર બ્લેક ટોપ પોસ્ટ પર કબજો જમાવ્યો, પરંતુ ચીની સેનાના કેમેરા અને સર્વેલાન્સ ઉપકરણોને પણ હટાવી દીધા છે.

ANIની રિપોર્ટ મુજબ, હકીકતમાં ચીની સેના પીપલ્સ લિબરેશન આર્મી (PLA)એ પૈંગોંગ સરોવરના દક્ષિણ કિનારા પર સ્થિત બ્લેક ટોપ પોસ્ટ પર કેમેરા અને સર્વેલાન્સ સિસ્ટમ લગાવી હતી. આ પોસ્ટ પર ભારતીય સેનાએ કબજો કરી લીધો છે અને કેમેરા તથા સર્વેલાન્સ ઉપકરણો પર ઉખાડીને ફેંકી દીધા છે.


સૂત્રોએ કહ્યું કે, ચીનની સેના બ્લેક પોસ્ટ પર કેમેરા સહિતના સાધનો લગાવીને તેનો ઉપયોગ ભારતીય સેનાની એક્ટિવિટીને મોનિટર કરવા માટે કરી રહ્યું હતું. અને જ્યારે પણ ભારતીય સેના અહીં પેટ્રોલિંગ માટે આવે તો તરત જ પોતાની જગ્યા હોવાનો દાવો કરી શકે. હવે ભારતીય સેનાએ બ્લેક ટોપ પોસ્ટ પરના ચાઈનીઝ ઉપકરણો હટાવીને ચીનની સેનાને પણ પાછળ ખસેડી દીધી છે. સાથે જ આ મહત્વપૂર્ણ પોસ્ટ પર કબજો કરી લીધો છે. આ પોસ્ટ LACની આ તરફ ભારતીય સીમામાં આવે છે.

ઉંચાઈ પર કબ્જો કરવાના ચીની ઈરાદાઓ સમજી જતા પાછલા અઠવાડિયે ભારતીય સેનાએ એક ખાસ ઓપરેશન યુનિટ તથા શીખ લાઈટ ઈન્ફ્રેન્ટ્રી સહિત એન્ટી-ટેન્ક ગાઈડેડ મિસાઈલોને પહાડની ઉંચાઈ પર તહેનાત કરી હતી. આ યુનિટ ચીનીઓ દ્વારા કોઈપણ હરકતનો જવાબ આપવામાં સક્ષમ છે.

શું છે સમગ્ર મામલો? ઉલ્લેખનીય છે કે બંને દેશો વચ્ચે હાલમાં જ પૈંગોંગ સરોવરના દક્ષિણ કિનારે સ્થિત એક પહાડને લઈને અથડામણ થઈ હતી. બ્લેક ટોપ નામની આ ટોચ એલએસીના આ તરફ એટલે કે ભારતીય સીમામાં છે, પરંતુ તેના પર કોઈ દેશનો કબ્જો નહોતો. ચીન આ ટોચ પર કબ્જો કરવાના પ્રયાસમાં હતું, જેને ભારતીય સેનાના જાંબાઝ જવાનોએ નિષ્ફળ કરી દીધું.