મોદી સરકારે માન્યું, નોકરીઓની તકોમાં 60 ટકાનો થયો ઘટાડો

નવી દિલ્હી: મોદી સરકાર નવી નોકરીો ઊભી કરવામાં નિષ્ફળ રહી છે. તેનો ખુલાસો શ્રમ અને રોજગાર મંત્રાલયના રિપોર્ટમાં કરવામાં આવ્યો છે. મોદી સરકારના ત્રણ વર્ષથી વધુના કાર્યકાળમાં નવી નોકરીઓની તકોમાં 60 ટકાથી વધુનો ઘટાડો આવ્યો છે. તેનો અર્થ એ છે કે જેટલી નવી નોકરીઓ 2014માં માર્કેટમાં ઊભી થઈ હતી, તેની સરખામણીમાં વર્ષ 2016માં 60 ટકા ઓછી રોજગારની નવી તકો ઊભી થઈ. વર્ષ 2014માં માર્કેટમાં 4.21 લાખ નવી જોબ્સ ઊભી થઈ. તો વર્ષ 2015માં માત્ર 2015માં માત્ર 1.35 લાખ નવી નોકરીઓ માર્કેટમાં આવી. એ જ રીતે 2016માં લગભગ 1.35 લાખ નવી જોબ્સની તકો ઊભી થઈ. પીએમ મોદીએ દેશના લોકોને એ વચન આપ્યું હતું કે તેમની સરકાર એ પ્રકારની પોલિસી લઈને આવશે, જેનાથી દર વર્ષે લગભગ 2 કરોડ નવી જોબ્સ મળશે. અર્થશાસ્ત્રી સારથી આચાર્યનું કહેવું છે કે, નવી નોકરીઓમાં ઘટાડો આવવાનું સૌથી મોટું કારણ મેન્યુફેક્ચરિંગ સેક્ટર ગ્રોથમાં ઝડપી ઘટાડો છે. છેલ્લા 3 વર્ષમાં મેન્યુફેક્ચરિંગ સેક્ટરનો ગ્રોથ 10થી ઘટીને એક ટકા રહી ગયો છે. તેનું કારણ છે કે, માર્કેટમાં ડિમાન્ડ નથી. જ્યારે ડિમાન્ડ નથી તો તેનો અર્થ છે કે ખરીદી નથી થઈ રહી. ત્યારે કંપનીઓએ ઉત્પાદન ઓછું કરવું પડશે. જ્યારે ઉત્પાદન ઓછું થશે તો પછી કઈ રીતે માર્કેટમાં નવી જોબ્સ આવશે.

સ્કિલ ડેવલપમેન્ટ સ્કીમ સામે ઊભા થયા સવાલ

સ્કિલ ડેવલપમેન્ટ સ્કીમ સામે સવાલ ઊભા થવા લાગ્યા છે. તેના દ્વારા દેશમાં વ્યાપક સ્તર પર જોબ મળવાની આશા હતી. ગત 3 વર્ષમાં 30 લાખથી વધુ યુવાનોને આ સ્કીમ અંતર્ગત ટ્રેનિંગ મળી, પરંતુ જોબ મળી 3 લાખથી પણ ઓછા લોકોને. આ સ્કીમ અંતર્ગત 2016-20 માટે સરકારે 12,000 કરોડનું બજેટ એલોટ કર્યું.