દેપસાંગ-પેંગોંગમાં હજુ પણ તણાવ, ચીન સાથે 5માં તબક્કાની સૈન્ય વાતચીત આજે

નવી દિલ્હીઃ પૂર્વ લદ્દાખમાં ભારત અને ચીનની વચ્ચે તણાવ ઓછો થવાનું નામ નથી લઇ રહ્યો. એક બાજુ પેંગોંગ સો અને દેપસાંગમાં ચીની સૈનિકોના પાછળ હટવાના કોઇ સંકેત મળી રહ્યા નથી બીજીબાજુ ચીન LAC પર અરૂણાચલ પ્રદેશ સુધી સતત પોતાના સૈનિકોની સંખ્યા વધારી રહ્યું છે. એવામાં પહેલા અહેવાલ આવ્યા હતા કે બંને દેશોની વચ્ચે થનાર સૈન્ય કમાન્ડર સ્તરની વાતચીતને આવતા સપ્તાહ સુધી ટાળી દેવામાં આવી શકે છે. જોકે હવે આ બેઠક આજે બપોરે યોજાઈ શકે છે.

ચીનની હરકતોને ધ્યાનમાં રાખતા ભારતે 14 કોર્પ્સ કમાન્ડર લેફ્ટિનેંટ જનરલ હરિંદર સિંહ અને ચીની મેજર જનરલ લુઇ લિનની વચ્ચે 5મા રાઉન્ડની વાતચીત માટે બિલકુલ જોર આપ્યું નહોતું. બંને દેશોની વચ્ચે પાંચમા રાઉન્ડની આ વાતચીત 30મી જુલાઇ માટે પ્રસ્તાવિત હતી. પરંતુ ચીનના ઇરાદાને જોતા હાલ વાતચીતને ટાળી દેવામાં આવી હતી. પરંતુ શનિવારે મોડી સાંજે ચીન દ્વારા આગ્રહ કરવામાં આવતા આજે ફરી આ બેઠક મળી શકે છે.

‘ચીનના પાછળ ના હટવાના બે કારણો’

અધિકારીઓના મતે પેંગોંગ સો અને દેપસાંગમાં ચીની સૈનિકોની પાછળ ના હટવાના બે કારણો હોઇ શકે છે. પહેલું બંને દેશોની વચ્ચે 14 જુલાઇના રોજ સૈન્ય કમાન્ડર સ્તરની ચોથા રાઉન્ડની વાતચીતમાં ડિસએંગજમેન્ટના જે પ્રપોઝલ પર સહમતિ બની હતી તેને લાગૂ કરવી કે નહીં. તેને લઇ ચીન હજુ પણ દુવિધાની સ્થિતિમાં છે. બીજું ચીન આ વિવાદને ખેંચીને શિયાળા સુધી લઇ જવા માંગે છે.

એરફોર્સ અને નેવી એલર્ટ

સૂત્રોના મતે ભારતીય વાયુસેના શિયાળાની મોસમમાં પણ વાસ્તવિક નિયંત્રણ રેખાને અડીને આવેલા ક્ષેત્રોમાં એલર્ટ રહેશે, તો ભારતીય નૌસેના હિન્દ મહાસાગરમાં આક્રમક પેટ્રોલિંગ કરશે. સૂત્રોએ કહ્યું કે ભારતીય સેના પૂર્વ લદ્દાખમાં લાંબા સમય સુધી ચાલનાર આ ગતિરોધને લઇ વિસ્તૃત તૈયારી કરી રહ્યું છે.

ચીનની સાથે 4 વખત સૈન્ય સ્તરની વાતચીત થઇ

ક્ષેત્રમાં શાંતિ અને સ્થિરતા પુન:સ્થાપિત કરવાના લક્ષ્યથી પૂર્વ લદ્દાખમાં સંઘર્ષવાળી જગ્યાથી સેનાઓની વાપસીને લઇ હજુ સુધી બંને દેશોની સેનાઓના ટોચના સૈન્ય કમાન્ડરોની વચ્ચે ચાર તબક્કાની વાર્તા થઇ ચૂકી છે. ઉલ્લેખનીય છે કે પાંચ જુલાઇના રોજ રાષ્ટ્રીય સુરક્ષા સલાહકાર અજીત ડોભાલ અને ચીનના વિદેશ મંત્રી વાંગ યી એ ટેલીફોન પર લગભગ બે કલાક સુધી પૂર્વ લદ્દાખમાં બંને દેશોની વચ્ચે તણાવને ઓછો કરવા માટે ચર્ચા કરી હતી. બંને પક્ષોએ આ વાર્તા બાદ છ જુલાઇ બાદ પાછળ હટવાની પ્રક્રિયા શરૂ કરી હતી.