પેટ્રોલમાં લિટરે રૂ. 1.42, ડીઝલમાં રૂ. 2.01નો ઘટાડો

નવી દિલ્હીઃ સરકારી ઓઇલ કંપનીઓએ પેટ્રોલ અને ડીઝલની કિંમતોમાં ઘટાડો કર્યો છે. પેટ્રોલમાં લિટરદીઠ રૂ. 1.42 અને ડીઝલમાં રૂ. 2.01નો ઘટાડો કરવામાં આવ્યો છે. નવી કિંમતો રવિવારે મધરાતથી લાગુ થશે. ઇન્ડિયન ઓઇલ કોર્પોરેશનના જણાવ્યાનુસાર, દિલ્હીમાં હવે પેટ્રોલ લિટરદીઠ રૂ. 61.09માં મળશે, જેનો લિટરદીઠ ભાવ રૂ. 62.51 હતો. એ જ રીતે દિલ્હીમાં 54.28 રૂપિયે વેચાતું ડીઝલ રૂ. 52.28માં મળશે.

આ પહેલાં પણ જુલાઈમાં ઓઇલ કંપનીઓએ બે વાર પેટ્રોલ અને ડીઝલની કિંમતોમાં ઘટાડો કર્યો હતો. છેલ્લે 16મી જુલાઈએ ભાવ ઘટાડતાં પેટ્રોલ લિટરદીઠ રૂ. 2.25 અને ડીઝલ 42 પૈસા સસ્તું થયું હતું. જ્યારે આ પહેલાં 30મી જૂને પેટ્રોલમાં લિટરદીઠ 89 પૈસા અને ડીઝલમાં 49 પૈસાનો ઘટાડો કરવામાં આવ્યો હતો. દેશમાં ઓઇલ કંપનીઓ પેટ્રોલિયમ પ્રોડક્ટ્સની કિંમતોની સમીક્ષા કરતી રહે છે અને ત્યાર બાદ ઇન્ટરનેશનલ ક્રૂડની કિંમતોના આધારે ઘરેલુ કિંમતોમાં ફેરફાર કરે છે.