મકાન માલિકે મહિલાને ઘરમાંથી કાઢી મૂકી, 3 દિવસ રસ્તા પર સમય પસાર કર્યો અને...

કોરોના વાયરસ અને લોકડાઉનના કારણે સામાન્ય જનતાના જીવનમાં અનેક ફેરફાર જોવા મળ્યા છે. ઘણાં લોકોએ નોકરી ગુમાવી અને બેરોજગારીમાં વધારો થયો છે. ઘણાં લોકોએ શહેર છોડ્યા છે તો બજારમાં પણ મંદીની અસર છે. ત્યારે હવે મુંબઈમાં રહેતી 35 વર્ષીય મહિલાએ ઘરનું ભાડું નહીં ભરી શકતા તેને મકાન માલિકે ઘરમાંથી તગેડી મૂકી હોવાની ચોંકાવનારી ઘટના સામે આવી છે. હવે આ મહિલાની મદદ માટે પોલીસ આગળ આવી છે.

એક વેબસાઈટના જણાવ્યા અનુસાર કવિતા ઐય્યર નામની આ મહિલા જ્યારે તેની ઓફિસ ગઈ હતી ત્યારે તેના ઘરનું તાળુ તોડીને મકાન માલિકે પોતાનું તાળુ લગાવી દીધું. ત્યારબાદ આ મહિલાએ પોલીસનો સંપર્ક કર્યો. કવિતા નામની આ મહિલા ઓફિસનું કામ પૂરું કર્યા પછી છેલ્લા 3 દિવસથી રસ્તા પર સમય પસાર કરી રહી હોવાનું પણ જાણવા મળ્યું છે.

આ મહિલાએ તેના મકાન માલિકને સૂચના આપી હતી કે તે થોડા સમયમાં ભાડાની સંપૂર્ણ રકમની ચૂકવણી કરશે. મકાન માલિકે આ મહિલાને ઘરમાંથી તગેડી મૂકતા પહેલા તેને કોઈ નોટિસ પણ આપી નહોતી. આ મહિલાના બેંકના કાગળિયા, કપડા અને ઘરેણાં પણ તે ભાડાના મકાનમાં જ પડ્યા હતા.

મકાન માલિકે આ મુદ્દે વાત કરતા જણાવ્યું કે આ મહિલાએ છેલ્લા ચાર મહિનાથી ઘરનું ભાડું ચૂકવ્યું નહોતું એટલે મેં દરવાજો બંધ કર્યો છે. હું આ મહિલાને પૂરી ડિપાઝિટ પરત કરવા માટે તૈયાર છું પણ મને ભાડાની જરૂર છે. આ મહિલાએ વીજળીનું બિલ પણ ભર્યું નહોતું.

આ મહિલાએ મકાન માલિક સામે પોલીસ ફરિયાદ નોંધાવી. તેણે જણાવ્યું કે મને પોલીસ સ્ટેશન બોલાવવામાં આવી. અહીં મને સન્માન સાથે ચાવી પરત કરાઈ. મેં જુલાઈ અને ઓગસ્ટ મહિનાનું ભાડું આપવાનું જણાવ્યું છે. ઘણાં લોકોએ મને મદદ કરી છે.