બિહારમાં આ તારીખ સુધી ફરી લંબાવાયું લોકડાઉન, રાત્રિ કર્ફ્યૂ પણ યથાવત

પટણા: બિહારની નીતીશ કુમાર સરકારે બિહારમાં લોકડાઉન વધારવાની જાહેરાત કરી છે. આ વખતે લોકડાઉન 17 ઓગસ્ટથી 6 સપ્ટેમ્બર સુધી રહેશે. અગાઉ, રાજ્ય સરકારે 30 જુલાઇથી 16 ઓગસ્ટ સુધી લોકડાઉન ચાલુ રાખવાનો નિર્ણય લીધો હતો. પરંતુ તેનો સમયગાળો રવિવારે સમાપ્ત થઈ ગયો છે. જે બાદ દરેક લોકો રાહ જોઈ રહ્યા હતા કે લોકડાઉન વધારવામાં આવશે કે અનલોની ઘોષણા કરવામાં આવશે. જોકે, રાજ્ય સરકારે ફરીથી લોકડાઉન લંબાવવાની જાહેરાત કરી દીધી છે.
આજે એટલે કે સોમવારે ગૃહ વિભાગની બેઠકમાં બિહાર સરકાર દ્વારા 6 સપ્ટેમ્બર સુધી લોકડાઉન ચાલુ રાખવાનો નિર્ણય લેવામાં આવ્યો છે. લોકડાઉનની જાહેરાત સાથે બિહારની શાળાઓ અને કોલેજો બંધ રહેશે. ધાર્મિક સ્થળો બંધ રાખવાનો નિર્ણય પણ લેવામાં આવ્યો છે. શોપિંગ મોલ્સ, સિનેમા હોલ પણ હજી ખુલશે નહીં. ધંધાકીય પ્રવૃત્તિઓમાં થોડી રાહત મળશે, પરંતુ પાર્ક અને જીમ પણ બંધ રહેશે. જોકે નાઇટ કર્ફ્યૂ ચાલુ રહેશે.