મનસેની દાદાગીરી, મુંબઈમાં ગુજરાતી બોર્ડને બનાવ્યા નિશાન

મુંબઈ: મહારાષ્ટ્ર નવ નિર્માણ સેના (મનસે)ના રાજ ઠાકરે કોઈપણ ભોગે ચર્ચામાં રહેવા ઉધામા મચાવી રહ્યા છે. વારે-તહેવારે મરાઠી અસ્મિતાના નામે મનસે વિવાદ છેડતું રહે છે. ફરી એકવખત મનસેએ ભાષાનો વિવાદ છેડ્યો છે અને તેના કાર્યકરોએ દાદર અને માહિમની દુકાનોના ગુજરાતીમાં લખેલા સાઈન બોર્ડ ઉતારી રીતસરની દાદાગીરી પર ઉતરી આવ્યા હતા. પોલીસે આ મામલે મનસેના સાત કાર્યકરોની ધરપકડ કરી છે. દાદરની જાણીતી મરાઠી જ્વેલરીની પેઢી પી એન ગાડગીલ અને માહિમની શોભા હોટલનું ગુજરાતીમાં લખેલું બોર્ડ મનસેના કાર્યકરોએ દાદાગીરી કરી ઉતારી લીધું હતું. ઉલ્લેખનીય છે કે, ગત માર્ચ મહિનામાં પણ મનસેએ વીજળીનું વિતરણ કરતી રિલાયન્સ કંપનીનો વિરોધ કર્યો હતો. તેનું કહેવું હતું કે, રિલાયન્સ કંપનીએ તેના ગ્રાહકોને મોકલેલા વીજ બિલમાં ગુજરાતી ભાષાનો ઉપયોગ કર્યો હતો. મનસેએ રિલાયન્સ કંપનીને મોકલેલા પત્રમાં માગણી કરી હતી કે, મહારાષ્ટ્રમાં મરાઠી સત્તાવાર ભાષા છે, એટલે વીજળીના બિલ માત્ર અંગ્રેજી અને મરાઠીમાં જ મોકલવા જોઈએ. આ ઉપરાંત તાજેતરમાં જ રાજ ઠાકરેએ મહારાષ્ટ્ર સરકારનું ‘લોકરાજ્ય’ માસિક હિંદી અને ગુજરાતીમાં પ્રકાશિત કરવા બદલ પણ નારાજગી વ્યક્ત કરી વિરોધ દર્શાવ્યો હતો. તેમણે કહ્યું હતું કે, હિંદી દેશની રાષ્ટ્રભાષા છે, તેવો નિર્ણય દેશમાં ક્યાંય થયો નથી, તો પછી દરેક રાજ્યોએ હિંદી શીખવું જ જોઈએ એવી જબરજસ્તી કેમ કરાય છે, એવો સવાલ તેમણે ઉઠાવ્યો હતો. આ પહેલા પણ મનસેએ નોકરીમાં ઉત્તર ભારતીયોને મળતી પ્રાથમિકતા, ભાષા, માંસાહાર જેવી બાબતોને લઈને વિવાદ ઉભા કર્યા છે. મુંબઈમાં પરીક્ષા આપવા આવતા ઉત્તર ભારતીયો પર મનસેના કાર્યકરો રીતસર તૂટી પડ્યા હતા.