આ રાજ્યની સ્કૂલોને છોકરીઓને નહીં ભણાવી શકે યુવાન પુરુષ શિક્ષક

જયપુર : રાજસ્થાનની સરકારી સ્કૂલોમાં છોકરીઓ સાથેના યૌન શોષણને રોકવા માટે રાજ્ય સરકારે વિચિત્ર પગલું ભર્યું છે. રાજ્યના શિક્ષણમંત્રી ગોવિંદ ડોટાસરાએ શુક્રવારે જણાવ્યું કે, છોકરીઓને સરકારી સ્કૂલમાં 50 વર્ષથી ઓછી ઉંમરના પુરુષ શિક્ષક નહીં ભણાવી શકે. આ શિક્ષકોને બદલે મહિલા શિક્ષકોની તહેનાતી કરવામાં આવશે. રાજ્ય સરકારના આ નિર્ણયને એક્પર્ટ્સે અપરિપક્વ અને બાલિશ ગણાવ્યો છે. જણાવી દઈએ કે, શિક્ષણ મંત્રીએ એમ પણ કહ્યું કે, આ નિર્ણય ત્યારે જ લાગુ કરવામાં આવશે જ્યારે અમારી પાસે પૂરતી સંખ્યામાં મહિલા શિક્ષિકાઓ હશે. સૂત્રો અનુસાર, સંભવત: તાજેતરમાં કેટલાક શિક્ષકો દ્વારા છોકરીઓના યૌન શોષણની ઘટનાઓ સામે આવ્યા બાદ આ નિર્ણય લેવામાં આવ્યો છે. શિક્ષણ મંત્રી ગોવિંદ ડોટાસરાએ આગળ કહ્યું કે, ‘શિક્ષક સંગઠનો અને શિક્ષકો સાથે વાતચીત કર્યા બાદ અમે એક રોડમેપ તૈયાર કરીશું અને નીતિ બનાવીશું, જેનાથી વધુમાં વધુ મહિલા શિક્ષિકાઓની નિયુક્તિ થઈ શકે. મહિલા શિક્ષિકાઓના હોવાથી છોકરીઓ તેમની સાથે પોતાની માતા અને બહેનની જેમ સમસ્યાઓ શેર કરી શકશે અને તેમને કોઈ સમસ્યા નહીં થાય.’ ઉલ્લેખનીય છે કે, રાજસ્થાનમાં અત્યારે કુલ 68,910 સ્કૂલ એવી છે જેમાં છોકરા અને છોકરીઓ ભણે છે. માત્ર 1019 સ્કૂલ એવી છે જેમાં માત્ર છોકરીઓ ભણે છે. કુલ 3.8 લાખ શિક્ષકોવાળા રાજસ્થાનમાં પુરુષ શિક્ષકો અને મહિલા શિક્ષિકાઓનો રેશિયો 2:1નો છે.