70 વર્ષની માતાને સ્કૂટર પર યાત્રા કરાવનારા 'શ્રવણ કુમાર'ને આનંદ મહિન્દ્રાએ આપી કાર

રોડ ટ્રિપની વાત કરીએ તો ટુ-વ્હીલર પર ટ્રાવેલ કરવાની વાત જ કંઈક અલગ છે. બાઈકના શોખીનોને તમે ઘણીવાર દેશભરમાં પોતાના ટુ-વ્હીલર પર ફરતા જોયા હશે. પાછલા વર્ષે એક મામલો સામે આવ્યો હતો જેમાં એક દીકરો પોતાની 70 વર્ષની માતાને સ્કૂટર પર જાણીતા યાત્રા સ્થળોના દર્શન કરાવ્યા હતા. 41 વર્ષના ડી. ક્રિષ્ન કુમારે પોતાની નોકરી છોડીને માતાને યાત્રા કરાવવા સ્કૂટર લઈને નીકળી પડ્યા હતા. આ દરમિયાન તેઓ આજના 'શ્રવણ કુમાર'ના નામથી જાણીતા બન્યા હતા.

આ ઘટના વાઈરલ થયા બાદ આનંદ મહિન્દ્રાએ ડિ. ક્રિષ્ના કુમારને એક બ્રાન્ડ ન્યૂ મહિન્દ્રા KUV 100 આપવાનું પ્રોમીસ કર્યું હતું. આનંદ મહિન્દ્રાએ પોતાનું આ પ્રોમીસ એક વર્ષ બાદ પૂરું કર્યું છે. જોકે હવે 18 સપ્ટેમ્બર 2020માં ક્રિષ્ના કુમારને મૈસૂરમાં મહિન્દ્રા ડીલરશીપ પર તેમની માતાની હાજરીમાં એક નવી કાર આપવામાં આવી હતી.

હાલમાં 41 વર્ષના ક્રિષ્ના કુમારે 16 જાન્યુઆરી 2018માં 'માત્રુ સેવા સંકલ્પ યાત્રા' શરૂ કરી હતી. આ દરમિયાન તેમણે કર્ણાટક ઉપરાંત દેશભરના ખાસ મંદિરો તથા નેપાળ અને ભુટાનના કેટલાક મંદિરોની પણ મુલાકાત લીધી હતી. ક્રિષ્ના કુમાર તેમની માતા સાથે પિતાના 19 વર્ષ જૂના સ્કૂટર પર નીકળ્યા હતા. પોતાની માતાની સેવા કરી શકે આ માટે તેમણે લગ્ન પણ નહોતા કર્યા.

તેમની તસવીર સામે આવ્યા બાદ આનંદ મહિન્દ્રાએ ટ્વીટ કર્યું હતું, હું તેમને પર્સનલી મહિન્દ્રા KUV 100NXT કાર આપવા ઈચ્છું છું જેથી તેઓ આ માતા-દીકરો બંને તેમનો આગામી પ્રવાસ કારમાં કરી શકે.

આ વિશે ક્રિષ્ના કુમારે જણાવ્યું હતું કે, મારા માતા પોતાના જીવનના સૌથી સારા સમયમાં રસોડામાં રહ્યા. તેમણે મૈસૂરની બહારના એકપણ સ્થળની ક્યારેય મુલાકાત નહોતી લીધી. આથી મેં તેમને યાત્રા કરાવવાનું નક્કી કર્યું.' તેઓ પોતાની માતા સાથે સવાર અને સાંજના સમયે ટ્રાવેલ કરવાનું પસંદ કરતા. તેઓ મંદિર, ધર્મશાળા અને તેમના શુભચિંતકોના ઘરમાં રહેતા હતા. ક્રિષ્ના કુમાર બેંગલુરુમાં કેટલીક કંપનીઓમાં કામ કરી ચૂક્યા છે અને પોતાના સેવિંગ્સથી માતાને યાત્રા કરાવી હતી.