માતાએ 7 વર્ષની દીકરીને 2 વખત બિલ્ડિંગ પરથી નીચે ફેંકી, બાળકીનું કરુણ મોત

I am Gujarat

માતાએ બાળકીને ઉતારી મોતને ઘાટ

બેંગલુરુ: બેંગલુરુમાં એક મહિલાએ બોલવામાં અક્ષમ પોતાની 7 વર્ષની દીકરીને ફ્લેટ પરથી બે વખત નીચે ફેંકી દીધી. ગઈકાલે બપોરે બનેલી આ ઘટનામાં બાળકીનું મોત થઈ ગયું છે. પોલીસે આ મહિલાની ધરપકડ કરી છે અને તેને માનસિકરુપે બીમાર જાહેર કરી દીધી છે. મૃત બાળકીનું નામ શ્રેયા સરકાર હતુ.

આવી રીતે કરી ક્રૂર હત્યા…

આ ઘટનાના સાક્ષીઓ અનુસાર પહેલી વખત નીચે ફેંકવાથી બાળકી બચી ગઈ પરંતુ તેને ગંભીર ઈજાઓ થઈ. ત્યારબાદ આરોપી માતા નીચે આવી અને પાછી બાળકીને નીચે ફેંકી દીધી. જે કારણે બાળકી સ્થળ પર જ મૃત્યુ પામી. આ ઘટના બાદ સ્થળ પર એકઠાં થયેલા લોકોએ તેને વીજળીના થાંભલા સાથે બાંધી દીધી અને પોલીસને બોલાવી લીધી.

પહેલીવારમાં બચી ગઈ હતી બાળકી

પાડોશીઓએ જણાવ્યું કે બાળકીની ચીસ સાંભળી તેઓએ બહાર નજર કરી તો જોયું કે તે લોહીથી તરબોળ છે. આરોપી મહિલાને નીચે આવતા જોઈ બધાને લાગ્યું કે તે તેની બાળકીને હોસ્પિટલ લઈ જવા માટે આવી હશે પરંતુ જ્યારે તેણે બાળકીને ફરીવાર નીચે ફેંકી તો આ જોઈને આજુબાજુના લોકો સ્તબ્ધ થઈ ગયા હતા.

માનસિક સંતુલન ગુમાવી ચૂકી હતી માતા

જ્યારે પહેલીવાર તે નીચે આવી ત્યારે તેને બાળકીને હોસ્પિટલ લઈ જવાનું કહેતા તે બધાની પર ગુસ્સે થઈ ગઈ અને કહેવા લાગી કે બાળકી માનસિક રીતે અસ્થિર છે. બીજીવાર બાળકીને નીચે ફેંક્યા બાદ જ્યારે તે નીચે આવી તો તેણે કપડા બદલી લીધા હતા પરંતુ સ્થાનિક લોકો તેને ઓળખી ગયા અને તેને વીજળીના થાંભલા સાથે બાંધી દીધી. પોલીસે આ વિશે જણાવ્યું કે આરોપી મહિલા કંચન સરકારનો તેના પતિથી 1 વર્ષ અગાઉ જ ડિવોર્સ થઈ ચૂક્યો છે. પતિ તેને અને તેની બાળકીને આર્થિક મદદ પૂરી પાડતો હતો. આરોપી મહિલાના પતિએ જણાવ્યું કે તે અવારનવાર બાળકીને ત્રાસ આપતી હતી.