ગરીબીના કારણે મજૂરે રૂપિયા 45 હજારમાં વેચી નવજાત દીકરી

આસામ: કોરોના વાયરસની મહામારી દરમિયાન આસામમાંથી એક ચોંકાવનારી ઘટના સામે આવી છે. કોરોના વાયરસની મહામારીમાં ગરીબીનો સામનો કરી રહેલા એક પ્રવાસી મજૂરે પોતાની 15 દિવસની નવજાત દીકરીને 45 હજાર રૂપિયામાં વેચી દીધી છે. પરંતુ, પોલીસે આ બાળકીને બચાવી લીધી છે. પોલીસે માનવ તસ્કરીના આરોપ હેઠળ એક પુરુષ સહિત બે મહિલાઓની ધરપકડ કરી છે.

પ્રાપ્ત જાણકારી મુજબ, આ ઘટના આસામના કોકરાઝાર જિલ્લાના એક ગામની છે. આ ગામમાં રહેતો દીપક નામનો વ્યક્તિ હાલમાં જ ગુજરાતથી પરત ફર્યો હતો, જ્યાં તે મજૂરી કામ કરતો હતો. માનવ તસ્કરી વિરુદ્ધ કાર્યરત એક એનજીઓના જણાવ્યા મુજબ આ વ્યક્તિ બેરોજગાર હતો અને પરિવારનું ગુજરાન ચલાવવામાં આર્થિક તંગીનો સામનો કરી રહ્યો હતો. આ કપરી સ્થિતિમાં તેની પત્નીએ બીજી દીકરીને જન્મ આપ્યો.

કોરોના વાયરસની મહામારીમાં આ વ્યક્તિએ કામ શોધવાના ઘણાં પ્રયાસ કર્યા પણ કોઈ સફળતા મળી નહીં. કમાણીનું કોઈ સાધન નહીં હોવાથી તેણે નવજાત દીકરીને વેચવાનો નિર્ણય લીધો. તેણે પત્નીને જણાવ્યા વિના તારીખ 2 જુલાઈના રોજ પોતાની દીકરીને રૂપિયા 45 હજારમાં વેચવાનો નિર્ણય લીધો.

આ ઘટનાની જાણ થતા જ તે વ્યક્તિની પત્ની અને ગામના લોકોએ ભેગા મળીને આ અંગે પોલીસમાં ફરિયાદ નોંધાવી. પોલીસે જણાવ્યું કે ફરિયાદ મળતા જ અમે તાત્કાલિક કાર્યવાહી કરી અને બાળકીને બચાવી લીધી. જયારે પૂછપરછ દરમિયાન તે મહિલાઓ કે જેઓને આ વ્યક્તિએ દીકરી વેચી હતી તેમણે જણાવ્યું કે અમે એક સંબંધી માટે આ દીકરી ખરીદી હતી કારણકે તેઓને કોઈ બાળક નથી.